Neiwind is wedder unnerwägens

van Ludgerd Lüske

Dei Mars. Klick up tau'n Vergröttern!

Dit is ein globaolet Mosaikbild van den Viking 1-Orbiter, äövernahmen in dei Ümloopbahn 1334, 22 in'n Februar 1980. Dei Biller werd in Punkt-Perspektive projizeiert, so as man dat ut ein Ruumschipp up dei Höchte van 2500 km seihn wörd.
In dat Zentrum ligg Valles Marineris, dei is 3000 km lang un an dei deipste Stä 8 km deip. Den sünd dor dei Kanäöle. Dei loopet van den Middel- un Oostdeil van Valles Marineris nördlik up ein dunklet Feld tau. Dat heit Acidalic Plantia, et ligg baoben rechts.
Up dei lünken Siete sünd dei drei Tharsis-Vulkaone. Bild: NASA.

Nao eine wäkenlange Pause is Neiwind nu wedder losfeuhert. In dei taukaomen Daoge schall dei Apparaot bi Glenelg nao ein Steinwark seuken, wo dei Steinbohrer Mars-Steinproven upnähmen kann.

Dei naofolgen Korte wiest den Weg, den Neiwind nao siene Landung up den Mars bit tau den Punkt SOL 56 an'n 2. Oktober 2012 feuhert is. Nu feuhert dei Apparaot up den greun inteikten Weg. (Biller NASA, LPL-Caltech, University of Arizona, Utschnitt deils afännert.)

Klick up tau'n Vergröttern!

Robert Zubrin, ein Ruumfohrtingenieur un Autor un uk Marsexperte ut dei USA, hett einen Marskalenner upstellt. Den Mars-Dag geef hei den Naomen Sol. Dat is praktischk un is nich tau'n Verwesseln mit dei Eerd-Daoge.
Nödig ist dat, wiel dei Mars anners üm dei Sünne löpp as use Eern. Ümmeräken dait man dat mit dissen Faktor: 1.0275. Ein Marsjohr hett 669 Sol (Mars-Daoge), dat wören denn 687 Erd-Daoge.

All an'n 2. Oktober 2012 köm Neiwind bi dat Sandfeld "Rocknest" (2,5 x 5 m) an. Dor wörd dei Instrumentenarm Kalibreiert un uk insettet. Dat was eine wichtge Testsaoke. In dei Fohrpause nöhm dat Fohrtüg 5 Sandproven, dei denn mit dei Laborinrichtungen CheMin un SAM unnersöcht wörden. Disse Arbeiten hörden noch tau dat Inbedrievsetten van den Apparaot. För dit Wark brukede man einige Wäken.

An'n 16. November 2012 (Sol 100) dreiht sik dei Rörde nao 44 Daoge Pause wedder. Mit ein lüttket Unnerbräken bi "Rocknest 3", mit einen APX-Spektrometer-Insatz, geiht et 25 m wieder nao den "Point Lake". Dei Platz schall nauer unnersöcht wern.

In dei Gägend van Point Lake köm Neiwind an'n Sol 102 an. Disse Upnaohme stammt van dei lünke Navigationskamera un dei wiest dei Yellowknife Bay.
(Bild: NASA, LPL-Caltech)

Dorbi schäöllt aal dei Instrumente an Bord van Neiwind upprobeiert wern. Dei Insatz van den Steinbohrer an einen passen Stein steiht an üppste Stä. Wenn disse Test fardig is, denn is dat Inbedievsetten van Neiwind afschlaoten. Bi Sol 102 (18.11.2012) hett dat Fohrtüg Glenelg all achter sik laoten.

Bit Sol 105 hett Neiwind eine Fohrt van 510 m schaffet. Dorbi hebbet dei Bord-Kameras 24.900 Biller knipset un an dat Roverkontrollzentrum van dat JPL sendet.
Disse Biller finnt man up disse Internetsiete.

Marsianerinnen ünner sik. Klick up tau'n Vergröttern!