An'n 05. Mai 2018 startede dei stationäre Nasa-Landeapparaot, InSicht (InSight) neumt, nao den Mars. Tausaome mit InSicht güngen twei Paket-Satelliten (CubeSats) tau'n eiersten Maol up eine Missionsreise. Wenn disse lüttken Ruumsonden gaut warket, kann dei Nasa mit dei Bordtechnik van dei einkeln Paket-Satelliten Statusinformationen äöwer InSicht up den Mars faoten.

Disse Graophik wieset nich twei Laptops, sünnern dat Zwilling-Mars-Cube-One(MarCO)-System in den Marsümloop. Nasa-Bild-Daoten: süh hier

Dit Twillings-Kommunikationsrelais, dat dat Nasa Jet Propulsion Laboratory in Pasadena, Kalifornien, bawde is ein Technologie-Utprobeiern mit den Naomen Cube one (MarCO). Disse lüttken Paket-Satelliten sünd eine Ruum-Fohrtüg-Klasse för sick mit eine lüttke Standard-Grötte un mit eine Standard-Modultechnik. Universitätsstudenten bawden deils disse Module. Eine heele Riege van disse lüttken Ruum-Sonden kunnen mit annere Raketen, dei noch'n bäten Platz äöwer harrn, in den Weltruum utprobeiert wern.

Dei Graophik wieset dat Zwilling Mars Cube One (MarCO) System, dat dör den wieden Weltraum flügg. Twei Paket-Satelliten sorget hier för Redundanz: Wenn ein Apparaot utfallt, hätt man jao noch den tweiden Apparaot. Nasa-Bild-Daoten: süh hier

Dat Fundament för ein Paket-Satellit is ein 10 Zentimeter groten Kassen. Et giff uck gröttere Paket-Satelliten mit x maol 10 Zentmeter. Dat Design van MarCO is ein Paket-Satellit mit 6 Einheiten achternanner mit eine Grötte van 36 cm, 24,3 cm un 11,8 cm (bold aktentaschkengroot).

Ein Paket-Satellit MarCO mit Ingenieur. Dei Ingenieur flügg nich mit. Nasa-Bild-Daoten: süh hier

Bi dat Induuken un Affstiegen in dei Marsatmosphäre un bi't Landen schall dei Landeapparaot Daoten up dat UHF-Funkband an den Nasa Mars Reconnaissance Orbiter (MRO) senden, dei denn äöwer den Apparaot langers flügg. MRO kann dei Landeinformationen äöwer dat X-Band an dei Eern wiederleiten. Dei MRO kann nich gliektiedig Daoten annähmen un affsenden, dat mutt immer in'n Wessel gaohn. Dorbi helpet denn dei lüttken Paket-Satelliten ut.

Dei beiden Paket-Satelliten sünd so utleggt, dat dei nao den InSicht-Start dei Dräger-Rakete verlaotet un up ehren eigenen Weg nao den Mars fleiget. Dorbi mäötet dei MarCOs twei Radioantennen un twei Solarflünke utfeuhern. Dei Hochleistungs-X-Band-Antenne is ein Plaonbildscherm, dei so upbawed is, dat dei at eine Parabolantenne dei Radiowellen leiten kann. MarCO stüert up ehre eigen Oort up den Mars tau.

Nasa-Bild-Daoten: süh hier

Disse CubeSat-Ruumsonde van MarCO (Mars Cube One) kann man in dat Jet Propulsion Laboratory van dei Nasa in Pasadena, Kalifornien, bekieken. Dat fautballgroote Funkgerät van MarCO hätt UHF-Funktionen (blots Empfang) und X-Band-Funktionen (Empfang un Äöwerdrägen). Dormit käönt Informationen, dei äöwer UHF empfangen werd, forts wiederleitet wern.

Plaonbildscherm-Antenne mit Parabolfunktion. Nasa-Bild-Daoten: süh hier

Upbau van dei Paket-Satelliten. Nasa-Bild-Daoten: süh hier

Dei Daoten loopet äöwer dat MarCO-System, solange, bit dei Mars Reconnaissance Orbiter wedder äöwer dei Landestä ankaomen is. Nasa-Bild-Daoten: süh hier

Bi dat Affstiegen dör dei Mars-Atmosphäre un bi dat Upsetten van InSicht dait dit Twillings-System Daoten an dei Eern wiederleiten. Wenn dei Mars Reconnaissance Orbiter, dei is all eine tiedlang in den Marsümloop, wedder äöwer dei Landestä flügg, kann dei uck Daoten van InSicht upnähmen un an dei Eern wiederleiten.
Wenn disse MarCO-Demonstrationsmission gaut afflopen dait, kunn man disse Technik uck bi annere taukaomen Mars-Missionen bruuken.