Labor up Rullen landet up den Mars van Ludgerd Lüske Dei ganze Neiwind-Mission op Platt: hier |
Mars Science Laboratory (kort MSL) is dei Naome för eine NASA-Mission un för dat dortao hören Wark för dat Forschken up den Mars, wat dei aktuelle un dei vergaohn Biospäre angeiht. Hiertau wörd up den Bodden ein meest sülfsloopen Rover mit den Naomen Curiosity (englischk för Neiwind) afsettet, dei mit teihn Instrumente tau'n Unnerseuken van Steinwark, Atmosphäre un Straohlung utrüst is. Tau disse Analyse kaomt eine groote Riege van Spektrograophen un uk Kameras un meteorologische Instrumente tau'n Insatz, wekke dei Daoten tau'n Utwerten nao dei Eern schicket. Mit eine Masse van 900 kg un dei Gröttde van ein lüttket Auto is Curiosity bit nuhen wiss dat schwörste van Menschkenhand bawde Deil up den Marsbodden un lösde dei Viking-Sonden, jedeine mit bolde 600 kg, in disse Hinsicht af.
Dei Technik wörd up dat Wäten van dei beiden Mars-Exploration-Rovers upbawed un hett in aale Andeile düütlik mehr Leistung. Baobenschup sind noch wisse Fortschritte dortaukaomen, sünners tau dat Landesystem (sachtet, passnauet Upsetten gägenäöver eine unwisse Airbag-Upschlaglandung). Wiederhen kreeg Curiosity bi dei Energieversorgung Radionuklidbatterien un kiene van't Weer afhangen Solarzellen.
An'n 26. November 2011 üm 15:02 UTC (koordinierte Welttied)
startede dei Sonde an Bord van eine Atlas V(541)-Rakete van dei Cape
Canaveral Air Force Station. Dei Landung wörd an'n 6. August
2012 üm 05:31 UTC bestätigt. Kort nao dei Landung füng
Curiosity an mit dat Senden van dei eiersten Biller nao dei Eern. |
Textquelln: Wikipedia: Mars Science Laboratory 16.8.2012 |