wer Wäderrägeln
in'n Maimånd
vun Behrend Böckmann In'n Maimånd gifft dat mihr Wäderrägeln, as dei Månd Dåch hett. wer 100 heff'k funnen un denk mi, dat dat wull noch por mihr gifft.
In'n Maimånd bringen dei Kollen Dåch den Lüdschnack nå sünd dat Pankrazi, Bonifazi, Servazi drei frostig Bazi un an'n Enn' fählt nie dei kolle Sophie männig Buern un Gornpüker inne Predulch. Un is dei Saat denn uplopen orrer dei Tüffeln un Georginen sünd all rut, denn hemm's af un an bäten Natt nödig, wer dei Sünn sall dat liekers noch nich tau dull måken, denn Is't kolt in'n Mai gifft Stroh un Heu!, un Wenn't Aastüüch* inne Küll möt läben, ward't 'n gaude Aust denn gäben!
Un von den Burrkäwer** ward secht, dat hei keinen Spaß hett, wenn dat in'n Mai kolt un natt is. Dat kümmt vör, dat dei einen seggen Inne Maimånd-Midd hett dei Winter noch 'n Hütt un dei annern glöben, dat inne Midd von'n Maimånd dei Winter ierst tau Enn' is. Noch annern hollen dat mit Dåk un Rägen un seggen Gifft dat in denn Mai väl Rägen, is dat för dat Johr dei Sägen un Dunnert dat in'n Mai recht väl, hett dei Bauer gaudet Späl orrer Maienmorgen dåkig-frisch, gifft denn bald 'ne gräune Wisch. Dat Maiwäder sall ok all up dat Wäder in'n Harst henwiesen. Denn dat heit taun Bispill Dat Wäder tau Sankt Urban wiest all dat Harstwäder an un Wenn tau Urban (25. Mai) kein gaut Wäder höllt, dat Wienfatt inne Pütt denn föllt. Dat sünd so por Rägeln, dei sik mit Küll un Rägen, Wassen un Austen un Winter un Sommer in'n Maimånd befåten. Dat gifft ok noch weck wer Wind un Wäder, Immen un Heu orrer Dod un Läben. Villicht stäkt in alle Rägeln äben soväl Wohrheit as in disse: Dunnert in'n Mai, is dei Prilmånd vörbi. * Aastüüch = Ungeziefer ** Burrkäwer = Maikäfer |
6.5.2022 |