Luftakrobaten 2019

In de verleden Johrn sünd uns flegen Insekten gewaltig trüchgahn. Al siet 'n Tied maakt de oostfreesche Hobbyfotograf Thomas Seemann Insektenfotos för Fotokalenner, de sien Team "Tandem"/OBW rutgifft. Verleden Johr hebbt wi mit düsse Fotos en Kalenner uns Bottervagels toegnet. Düt Johr schall dat üm annere Luftakrobaten in Pagels' Goorn gahn.

Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.


Oktober-Akrobat:
De Roodhalsbockkäver

vun Thomas Seemann un Marlou Lessing


Hebbt Se al mal en Bock schaten? In'n överdragen Sinn wisslich. Avers en Foto vun en Bock schaten villicht ok? Düt hier is een: de Roodhalsbockkäver, een vun uns heimische Bockkävers. De Aart finnst in ganz Eurasien un ok Noordafrika. Se hebbt ehrn Naam nich vun de Schaaps- orr Zegenböck, sünnern vun ehr Liekheit to de Steenböck, as dat Bild hier linkerhand wiest. De utermaten langen Föhlers vun düsse Kävers hebbt de Lü an de Hörns vun den Steenbock erinnert. Dorbi sünd avers de Föhlers vun de Bockkävers beweglich, wieldat se ut en ganze Reeg enkelte Leden bestaht. Mennigmaal sünd se länger as de ganze restliche Käver. Nich to glöven, avers wohr: Liekers düsse langen Antennen sünd de Bockkävers gode Flegers un verheddert sik dorbi nich!

Uns Bock hier is en Heken. Dat sühst an de hellen Flögeldecken. Dat Wievken is grötter un tomehrst roodbruun. Se hett ok den roden Hals; He hett bloots den Naam mitkregen. De utwussen Kävers freet Pollen un Blöden un leevt etwa vun Juni bet September. Dreept se sik, denn poort se sik, un dat Wievken leggt de Eier in dodes, opleevst möör Holt. Dor entwickelt sik de Larven.

Wedder hebbt wi bi düssen Käver dat Paradoxon, dat wi em as Käver seht un em sien Naam na dat Käver-Utsehhn geevt. Dorbi is he bloots een bit dree Maanden Käver — he verwannelt sik, kriggt sien Föhlers un sien nieg Gestalt un süht dat Licht bloots för de Phase vun Partnersöök un Poorung. Bloots för een Sommer. Wi seht bloots düsse helle Phase — utnahmen, he leggt sien Eier in en Stück Holt, dat uns wichtig is. Denn den ganzen groten Rest vun sien Levenstied — un bi Bockkävers köönt dat dörchut stückerwat Johren ween, bi'n Roodhalsbock twee — leevt he as unschienbor, week, rupenföörmig Larv. De Larven vun uns Roodhalsbock leevt in dat Holt, 'neem Mama de Eier afleggt hett, un freet sik dor so sinnig dör. Dat maakt düsse Aart teemlich unbeleevt un to en so nöömten Schädling. Dat Holt, 'neem de Larven in leevt un ehr Gänge freet, gellt denn as "befallen" un mutt mit Hitt orr Begasung bearbeit warrn, wenn dat överhaupt noch to redden is. Mehrst mutt de Balken denn uttuuscht orr de ganze höltern Carport afreten warrn. — Man in uns Woolden, dor deit düsse Käver (also sien Larven) veel Wark bi't Afbuun vun Doodholt. Mahltied, ji lütten Freters!

leven is:
ünner de bork
in't dunkel
freten

nee, seggt dat leven
eenmaal noch
muttst du rut
di verännern
an't licht
blomen eten un
flegen

mutt ik?
to wat?
to wat de ganze verännern,
de ganze
opstand?

is bloots, begöschert
dat leven, is bloots
för sex

wat schall ik? un
för wat?!?

reeg di nich op, seggt
dat leven
is bloots en kotte tied

dorna
töövt wedder dunkelheit op di


4.10.2019


na baven