De Libellenschöönheit baven hett ehr Tied noch nich ganz, dat is noch beten to fröh un to koolt; avers in en warmen Lent kannst de eersten Veerfleck-Libelln in'n April flegen sehn. Un se hett veer Flecken, un de April is de veerte Maand, dorüm schall se düssen Maand uns Akrobaten-Star ween.

De Binsen un all Waterplanten mit ehr lanzenaardig Bläder drievt nu eerst langsam wedder frisch ut. Togliek sluppt bald de eersten utwussen Libelln vun düsse faszineern Aart. Ehr Larventied hebbt se in siede, ruhige Water tobröcht. To'n Sluppen kladdert de Larven an Plantenstengels ut't Water rut.

De utwussen Veerfleck kann bet to 9 cm Flünkenspannwied hebben. Elk vun de veer Flünken hett vörn twee düüsterrood Flecken, dorwegen de Naam. Ok de Achterliev is bruunrood. Heken un Wievken seht sik liek. Dat Gesicht is geel, de reesenhaften Komplex-Ogen sünd bruun. Dat grote Deert lett wunnerschöön, wenn dat, as hier, in de Sünn glänzt.

De groten Ogen hett dat nich ümsünst, denn Libelln sünd Roofdeerten un freet anner Insekten. Tomehrst luert se ehr Büüt an't Water op. Uns Veerfleck haalt sogor lütte Fisch ut't Water — un se fritt to Noot ok ehr Aartgenossen. Wieldat se en Allrounder is, kümmt se mit all Gegenden good klaar, 'neem dat Water gifft; se leevt sogor noord den Polarkrink. Mitünner, wenn ehr dat nich mehr gefallt, fangt Gruppen vun Veerflecken an to wannern un bildt in Nullkommanix grote Swarms vun Millionen Deerten. Na'n Week is de Spuk vörbi, un de Libelln laat sik annerswo dal.

schöne gefohr
duppelflünkenturbo
grote ogen
grote fangwarktüüch
flüggt as en wimpernslag
döödlich blixen

du kiekst mi an, du
sühst mi
mit dien rundüm-ogen
un du denkst: en traag, plump wesen —
büüt... bloots beten to groot.
reglos minnachten.

dien schöönheit,
de ik bewunner,
is bloots affallprodukt.
wenn du kunnst,
wöörst du mi den dood bringen.
jichenswie
bewunner ik dat ok.