In dat Bild baven fleegt glieks twee Floogakrobaten en blöhen Plummentelg an. Dat is hüüt sogor in'n Märzmaand mööglich, dat de eersten Blöden opgaht! Opnahmen woor dat avers 2018. För de Bottervagels is de Tied noch lang nich dor; för de Immen bald. De Plummenboom blöht fröh, noch vör Kassbeer un Appel. Wennehr dat düt Johr wohl ween warrt?

Düsse lütten Sneekristalln schuult de Plummenblööt nich vör Frost

De Aavtblööt is een vun de "Markers" vun de Klimaverännern. Dat de Aavtblööt jümmer fröher insett, is ja prinzipiell een vun de moien Utwirken; wi all seht geern en blöhen Aavtboom. An'n mehrsten gifft dat Appelbööm, un ehr Blööt is de offizielle Marker. Bi den SWR in'n Süüdwesten warrt Mellen vun all Lüüd sammelt, wennehr en Appelboom to blöhn anfangt. Alltohoop verschuuvt sik de Blödenbeginn mit de milderen Winter langsam na fröhere Tieden. Grafiken dorto gifft dat hier. Un den aktuellen Stand in't Ole Land kannst hier sehn.

De Gefohr is dorbi natüürlich, dat de Blöden vun laten Frost drapen warrn köönt, verfreert und ingaht. Sünnerlich leeg is dat, wenn dat dröge Frost is, ahn Regen tovör; denn so köönt de Blöden sik nich tovör mit en schulen Iesschicht bedecken. Ünner dat Ies warrt dat nienich so koolt as an de klore Luft. Dorwegen maakt de Aavtbuern ehr Bööm ok natt, wenn in de Blöhtied Frost kümmt.

Liekso sünd de Immen faken Opper vun laten Frost. Se kaamt ut ehr Huus, rutlockt vun de Warms, fleegt to wied un verfreert, wenn de Avend kümmt. Anners as de Hummeln köönt de Immen sik nich dör Ziddern Warms verschaffen.

Sö mööt wi nu bald, schoonst wi keen richtigen Winter harrn, höpen, dat ok keen mehr kümmt.

Universum ut Deert un Plant, du
Kosmos — "dat Schöne"
un "de Ordnung" heet dat —
du Weeswark vull Sinn un Vernimm!
Planten ahn Benüll,
Deerten vull Instinkt —
een warkt in't anner,
keen Deel weet dat —
jüst dorüm hett allens sien Schick.
Nüms versteiht,
allens leevt.

Wi,
de wi anfungen hebbt to weten,
fangt an to verstahn:
Wi sünd bloots Sand,
Sand
in't Dreihwark.