vun Antje Heßler To'n Anhören hier klicken: Lesen deit Antje Heßler in Holsteener Platt. Wedder is dat Harvst un de Kantüffeln warrt ut de Eer haalt. Un ümmer wedder gifft dat niege Sorten. Vör twee Johr heff ik dat eerst Mal up den Weekenmark de Kantüffel Linda inköfft, de wull'n wi mal pröven. Se hett uns ok bannig goot gefullen un wi hebbt siet de Tiet blots ümmer Linda eten. Domaals is mi Linda sogor in Droom in de Mööt kamen, un dat keem so:
Mit en breden Grienscher in't Gesicht fung se an: "Dor weer eenmal en jungen Keerl. De köff sik up den Weekenmarkt twee Kilo Saatkantüffeln. In dat nächst Fröhjohr wull he se in sien Goorn anplanten. He wull geern tiedig de ersten Kantüffeln hebben. To'n Vörkiemen stell he se dorüm fien uprecht in en Kist. Dor weern ok mien Öllern mank. Se harrn al recht grote Kiemen, as he se in den Goorn anplanten wull. Aver he steek se mit de Kiemen na Ünnen in de Eer. He meen, dat weern de Wötteln. Mien Öllern weern aver so stark, se hebbt eenfach de Kiemen üm sik rüm ut de Eer dreven. Se kemen blots ornlich wat later ut de Eer!" Dor waak ik miteens up. Ik reev mi de Ogen. Gau leep ik in e Köök. Dor stünn noch ümmer mien Kantüffel up den Töller mit Sand. Sehg meist ut, as wenn se mi angrienen de.
Hier bi uns hett dat noch wat länger duert, bit de Kantüffel anbuut wöör. Uns Land, Sleswig-Holsteen, höör domaals to Däänmark. En Kirchenprobst ut Angeln harr vun den Kantüffelanbuu in Preußen höört. He hett de Buurn ut Angeln dorto bröcht, düsse Plant ok up ehr Land antoplanten. Hüüt is de Kantüffel en Volksnahrungsmiddel un is ut unsen Spiesplan nich mehr wegtodinken. Welk Lüüd leggt ut Dank noch hüüt Kantüffeln up dat Graff vun König Friedrich. Wat de König wull seggen wöör, wenn he wüss, dat man üm en gode Kantüffelsoort vör Gericht geiht. "Un dat üm miene Kantüffelsipp! Heff doch al ümmer seggt, wi sünd wat Besünneres!", wöör de Kantüffel Linda to mi seggen.
|
Stand Harvst 2005 in Saken Linda: De Lüneborger Zuchtfirma Europlant hett de Sortenschutz-Lizenz för Linda, un de wüllt se nu trüchtrecken, dat se ehr niege Sorte "Belana" an'n Markt dörchsetten köönt. För de niege Sorte mööt de Buern Lizenzgebühr betahlen, Linda dorgegen is nu ümsüss dorüm lett sik mit ehr keen Geld mehr verdenen, dorüm schall se weg. Europlant hett Buern, de Linda liekers plant, vör Gericht bröcht. 30 Johr is dat al, dat wi Linda eten dröfft un dat geern doot. Vele Verbraucherschützers un Börgers hebbt sik besweert, wieldat se meent, de Lü schullen sülven bestimmen, wat se eten wüllt nich de Rendite schull dat bestimmen. Nu is de Utloopfrist för Linda eerstmal üm twee Johr verlängert. Villicht passeert ja noch wat, dat wi ehr behollen köönt, wenn wi an'n Ball blifft. Wat Se as Kartoffeleter/sch doon köönt, köönt Se t.B. bi't Verbraucherministerium orr bi de Verbraucherzentralen (t.B. in Hamborg) rutfinnen. Dat Beste is jümmers noch: Fraagt Se in'n Laden orr op'n Markt na Linda, kööpt Se ehr veel un geern! Wenn Se wüllt, köönt Se de Europlant-Lü ok op de ehr Websiet en Mail schicken un ehr Ehr Menen to dat Verswinnenlaten vun Linda seggen! Un nu is Linda wedder dor! An 28.08. 09 stünn in't Blatt en Artikel: "Frohe Kunde
für Kartoffel-Freunde! Briten bauen "Linda" wieder
an." Toletzt ännert an'n 13.9.2009
|