Lilienhähnchen vun Anke Nissen Se köönt de mehrsten
Fotos per Klick vergröttern. Trüch kaamt Se denn mit den
Zurück-Knoop op de Browser-Symboolliest.
To'n Anhören hier klicken:
Lesen deit Anke Nissen in holsteiner Platt. Dat Lilienhähnchen is en Käfer vun wunnerschöön korallenrode Farv. Ik kenn em al vele, vele Johr. Ik kenn em so lang, as Lilien in unsen Goorn wassen. Dormals bummel ik mal mit unsen Goornerfründ dörch'n Goorn.
He bleev vör miene schöne lüchen witte Lilie stahn
un sä: "Oh", verjaag ik mi, "köönt de för miene Blomen gefährlich warrn?" "Na ja", sä de Gornerfründ, "dat sünd Blattkäfer, de freet diene Lilien. Un vör allen, du warrst de Deerten nich weller los. Ik heff Glück hatt, dat ik enen erwischt heff. De laat sik nämlich bi dat lüttst unwennt Bewegen eenfach dalfallen. Up de Eerd liegt se denn musenstill up'n Rüüch un beweegt sik nich. Du kannst se nich sehn; denn ehr Buuk is swart, du kannst se nich up de Eerd sehn, nich finnen."
Siet dormals slieker ik mi jümmers liesen ran an uns Lilien, un ik seh de roden Käfer, man so'n Glück as uns Goornerfründ heff ik nich ik erwisch nie enen. Dat Lilienhähnchen hett ja würklich enen hübschen Naam man mit miene Lilien geiht he nich goot üm. He fritt un fritt. De Spuren sünd düütlich an de Blomen to sehn. Un denn deit he sik mit Fru Käfer tohoop un bald sünd grulich utsehn brune Larven up miene Lilien togangen, de gresig utseht. Un de freet meist noch mehr.
Dor heff ik mi seggt, dat helpt nix, ik mütt mi an't Afsammeln vun de grulich Larven maken. Man as ik nu up de Knee dal güng un graad dach, villicht krieg ik ja ok poor vun de utwussen Käfer faat, dor keem natürlich mien leef Mann: "Nu laat doch de lütten hübschen Käfer in Ruh. Se wüllt doch ok leven...!" Würklich af un to kunn ik den Mann an de Wand klatschen! Un denn een Dag dor entdeck ik korallenrode Placken an Navers Schachbrettblomen. Dat sünd doch wohl nich...? Ik gah nehger ran. Doch, dor seten de Lilienhähnchen an disse besünner Bloom.
Keen Wunner, de Schachbrettbloom (Fritillaria meleagris) höört to de Familie vun de Liliengewächse (Liliaceae). De Schachbrettbloom warrt ok Schachbloom nöömt, in Holland heet se Kiebitz-Ei un up Fehmarn hebbt wi Kibitzbloom dorto seggt. De Schachbrettbloom hett geern natte Fööt, man vun baven will se veel Licht, vullet Licht. Ik meen, in'n Goorn höllt se sik nich lang. Un wenn nu dat togeven hübsche Lilienhähnchen mit all siene grulich Larven över Navers Blomen herfallt, denn höllt se sik erst recht nich lang, de Schachbrettbloom. Ik kiek mi kort üm un denn gah ik up de Knee un fang mit't Afsammeln an... Biller Lilienhähnchen: Felix
Abraham/Wikimedia Commons,
Olaf Leilinger/Wikimedia Commons, Holger Casselmann/Wikimedia Commons 26.1.2014 |