Fröh in'n Sommer — Leed un Freud

vun Meike Balzer-Fraun

Anfang Juni heff ik schreven: "Bün neeschierig, wo dat in'n Sommer un Harvst dor buten wieder geiht un welk Planten sik op welk Oort an den Klimawannel wennt."

Veer Weken later:
Dat Regenwedder hett de nakelten Snicken in'n Draff brocht. Se hefft de Bläder vun de Zucchini bald kumplett opfreten. Noch kämpt de Planten mit Blöten dorgegen an, man ik glööv nich, dat se den Kamp överleven doot.

Verleden Nacht harrn wi Besöök vun en Reh. De "Deutsche Wildtier Stiftung" schrifft den Sinn na: "Das Reh ist ein anpassungsfähiger Kräuterprofi. Artenreiche Wildpflanzenmischungen sind besonders gut für das Rehwild."

Man ‚oordenriek' un ‚Wildplanten' sünd twee Frömdwöör in uns Dörp. De Spiesplaan vun uns Deert süht nu so ut:

• Vörspies: De Navern ehr Fallaaft vun de Augustappeln
• Hööftgericht: De zoortst Bläder vun uns Busch- un Stangenbohnen
• Nadisch: De dicksten Knuppen vun uns Phlox

So'n Reh is also wohrhaftig anpassdüchtig!

Mehr Leed as Freud: Dat Reh hett allens affreten!

Nu hööp ik, dat nich noch en Wildswien sik över uns Kantüffeln hermaakt.

Wenn dat ok faken regent, bewunnert wi aver de fröhe geile Blomenpracht dit Johr, laat uns de Kantüffeln smecken un sünd froh, dat wi vun uns Grööntüüch nich leven mööt.

Kantüffeln sünd in't Nett gahn!

Köönt wi mal buten sitten, freut wi uns an de Botterlickers, Hummeln, Immen un Libellen. Wi sünd dankbor, dat de Meeschen un Lünken de Rupen vun de Buchsboomzünzlers as Foder bruukt hefft — de lütten Piepmätz sünd gau groot worrn, un de Buchsbööm sünd wedder gröön!

Un ehr dat wi na Bett gaht, luustert wi to dat Avendleed vun de Amseln, luuert op dat Opblöhen vun de Nachtkarsen, geneet de ehr Röök un amüseert uns över de Flattermüüs, de dör de Luft susen doot.

Bün neeschierig, wat ik dit Johr woll Bohnen plücken kann.