Salomonssiegel vun Anke Nissen Se köönt de Biller per
Klick vergröttern! Trüch kaamt Se denn mit den Zurück-Knoop
op de Browser-Symboolliest.
König Salomon en König, den wi ut de Bibel kennt is vun de Lüüd to sien Tiet hoch in Ehren hollen worrn; denn he weer gerecht. He harr enen Siegelring, de allgemein as Teken vun de "Weisheit" gell. Un disse Siegelring hett uns Plant den Namen geven; denn de Wörtel wiest dor Narben, wo de Stengel in fröher Johren rutwussen sünd. Un disse Narben süllt wohl utsehen, as König Salomo sien Siegelring. Disse Narben in den Wörtelstock kann een goot sehen up de Teknung ut Leonhart Fuchs sien oll Krüderbook. De Legende vertellt, dat König Salomon mit de Töverkraft vun de Wörtel de Felsen sprengt hett, för de Steen, de he to 'n Bu vun sienen Tempel bruukt hett.
As ik in miene ollen Krüderböker na Salomonsiegel keek, heff ik em eerst gor nich funnen. Ik müß mi eerstmal överleggen, ünner welk Naam de Plant fröher wohl bekannt weer, un ik keem up "Weißwurz". Un richtig ünner dissen Naam heff ik unsen Salomonsiegel funnen. Leonhart Fuchs schrifft as Bispill:
In fröher Tieden is de Salomonsiegel-Wörtel to 'n Blootdrucksenken un to 'n Harndrieven bruukt worrn. Ut Krüderböker:
Olle Krüderböker maakt noch keen Ünnerscheed mank Salomonsiegel (Polygonatum odoratum) un Weißwurz (Polygonatum officinalis Allioni). En Plant mit den Namen Salomonsiegel kann man natürlich in'n Bibelgoorn finnen. Dit is aver ene Waldplant. Se bruukt Eerd, de Kalk in sik hett. De echte Salomonsiegel hett kantig Stengel. He hett lütte witte licht duften Blöden-Glocken, de in en gröön Spitz endt. En beten wat süht de Salomonsiegel ut as en bannig groot Maiglöckchen. Siene Beeren sünd blaag-swart. Salomonsiegel hett jüst so as Maiglöckchen giftig Glykoside in sik. In fröher Tieden wörr de Wörtel vun unsen Salomonsiegel as Amulett dragen, dat Glück bringen sull. Noch hüüt sall dat Bruuk sien bi de Sorben in Oberlausitz, se buddeln an'n 24. Juni de Wörteln vun disse Plant ut un verwendt de as Amulett. Se nöömt dor de Plant Johanniswürz. Ik heff ok den Namen " Jageteufel " för den Salomonsiegel funnen. De Naam wiest dor up hen, dat de Lüüd glöövt hebbt, dat de Plant de Wörtel, dat Amulett böös Töver twei maken kunn, böös Geistervolk verjagen kunn. Mien leef Mann vertellt, dat sien Opa jümmers seggt hett, dat he bi afnehmen Maand de Wörtel vun 'n Salomonsiegel för poor Daag in sien Büxentasch mit sik rümdragen hett. Un worüm? Ja, dat sull en goot Mittel gegen Liekdörns sien. |
||||||||
22.5.2011 |