Wenn sien Tiet dor is, in't Fröhjohr, un wenn ik den eersten
sehen do mehrstendeels up'n Wochenmarkt denn kann ik
dor nich an vörbi finnen, ik mütt en poor Stangen mitnehmen.
Un denn kaak ik eerstmal ![](naturbiller/rhab2.jpg)
Rhabarberkompott:
Rhabarber waschen,
in Stücken snieden
un blots mit'n beten Zucker in'n Pott
in'n egen Saft goren laten.
Wenn denn mien Lüüd an't Huus kaamt, denn höör
ik: "Hmmm, wat rückt dat hier goot!"
Man denn seggt se glieks achteran: "Ach du leve Tiet, dat is
je Rhabarber!"
Un denn stöhnt se: "Oh, Mann! Nu
geiht dat wedder los:
Rhabarberkompott,
Rhabarber-Rode-Grütt, (mal mit Vanille-Pudding-Pulver andickt,
mal mit Sago),
Rhabarber-Koken,
Rhabarbertort mit Baiser baben up,
Rhabarbermarmelaad."
Vergeten hebbt se bi dit Gestöhn den Rhabarberpudding. Hüüt
seggt een dor woll "Rhabarberauflauf" to. Ik eet em to un
to geern! He warrt warm eten.
Fröher,
as mien Mudder dissen Pudding kaken dee, hett se dor veel Tiet to
bruukt. De Pudding wörr dormals in enen Pott mit kaken Water
goort. Ünnen in den Pott keem eerst en Schamottsteen rin un denn
de Puddingform baven rup. Dat Ganze müß so 2 bet 2 ½
Stunnen kaken. Un mien Mudder harr je kenen elektrischen Herd, nee,
se müß dat Füür in'n Herd so versorgen, dat de
Pott jümmers so even weg kaken dee.
Ik spoor mi al lang den groten Waterpott un goor den Pudding in en
Jenaer Glasform, un de schuuv ik in'n Backaven, denn bruuk ik blots
noch en Stunn.
Un uns' Dochter se hett mi in'n verleden Johr mal an't Telephon
haalt un fraagt:
"Kannst du mi nich mal dat Rezept vun unsen olen, goden Rhabarberpudding
vertellen?"
se stellt de Glasform in de Mikrowell un bruukt denn blots noch 12
bet 15 Minuten.
Un hier is dat Rezept:![](naturbiller/rhab6.jpg)
Rhabarber-Uploop:
500 g Rhabarber
500 g Quark (dor genügt de magere)
2 Eier Dat Witte vun't Ei sall to Snee slagen un an'n Sluß
ünner den Deeg röögt warrn. Mi duurt dat jümmers
to
lang, ik röög de ganzen Eier rin.
3 Eetlöpel Zucker, un:
'n Prise Solt jo nich vergeten !
Vanillezucker orrer dat Mark vun ene Vanille-Schoot
Saft vun en halve Zitroon, un wer mag, kann ok afreven Zitroonschaal
ran doon, ik do't nich.
60 g Grieß
½ P. Backpulver
Rhabarber
waschen, putzen un in lütte Stücken snieden, so 3 cm lang.
Allens anner tohoop rögen.
Denn fett ik de Glasform in,
do dat Halve vun den Deeg rin, verdeel de Rhabarberstücken dor
up
un bedeck de mit den Rest vun den' Deeg.
Babenup kümmt noch en beten Botter "Butterflöckchen",
Deckel up un rin in'n Backaven, up de tweet Schien vun ünnen.
Mien Herd bruukt bi 150° bet 160° so 55 bet 60 Minuten.
De Mikrowell bruukt blots 12 bet 15 Minuten.
Goden Appetit!
wünscht Anke Nissen
|