Dat Kruut för'n Oostermaand:
Odermennig

vun Anke Nissen

Agrimonia eupatoria — Familie Rosaceae (de Rosen-Familie)

gegen Magen- un Darmkatarrh

Odermennig wasst up Waldlichtungen, Heide un Wischen.
De Bläder warrt in Mai un Juni sammelt.
De lütten hübschen Blöden hebbt fiev gele Blödenbläder. Dorher kaamt villicht de Namen: Fievblatt (Fünfblatt) un Fünffingerkraut.

Disse Plant weer al in de Antike as Heilplant bekannt.
So hebbt de ollen Griechen se bruukt as Mittel gegen Wunnen un Geschwüre vun de Huut.
Grote Dokters in de Antike — as Galenus un Plinius — hebbt se kennt.
De ollen Ägypter hebbt Odermennig bi Ogen-Lieden anwennt.
Hildegard von Bingen hett Odermennig vör allen bruukt bi Lievpien, Besweern vun'n Maag.
De Mönk Walahfrid — he is 808 orrer 809 up de Welt kamen — schrifft, dat Odermennig goot to'n Behanneln vun Wunnen to bruken is., man he snackt vun Wunnen, de een vun Fienden — dörch Hieb- orrer Stichwaffen — kregen hett.

In dat Kreutterbuch vun Leonhart Fuchs steiht:

"Die bletter der Odermenig mit alltem schweinem schmalz warm aufgelegt / heylet die wunden so sich nit leicht zur heylung schicken wollen."

Hals un Mund

Ik heff ene Fründin, de kunn fein singen. Harr se enen Uptritt, denn gurgel se mit Odermennig.
Se nehm:
2 Teelöpel Odermennig-Kruut,
övergeet dat mit ¼ l kaken Water,
leet dat 5 Minuten trecken,
un schütt dat dörch en fien Sieb.
Mit dissen Tee hett se denn düchtig gurgelt un ehren Mund spöölt.
Se meen, dat weer goot för ehre Stimm —
se meen ok, dat kunn helpen bi Halsweh un Entzünden in'n Mund.

Fööt baden gegen Migräne

Mien Fründin Ingeborg hett mi enen Kalenner schenkt, "Apotheke der Natur", dor schrifft Dr. Barbara Wedekind över en Rezept gegen Migräne, dorna mütt een sien Fööt in Odermennig baden:
2 Handvull dröögt Odermennig-Kruut (Bläder un Blöden)
in hitt Water ansetten,
enen halven Dag trecken laten,
denn de Fööt dor en halve Stunn in baden.
Migräne is ene slimme Plaag, un de Minsch freut sik al över de lüttst Help gegen disse Kopp-Pien. — Utprobeern!

Ümslääg för'n Maag un gegen Fever

Uns Dochter maakt gern enen Ümslag ut Odermennig gegen Lievpien — un ok gegen Fever:
4 Teelöpel dröögt Odermennig-Kruut
mit ¼ l hitt Water övergeten,
10 Minuten trecken laten,
afseihen.
Dor weke Döker in utdrücken un up den Maag leggen,
bi Fever up de Stirn.

Tee för de Gall

Dat heet, dat de Gall mit Tee ut Odermennig to Ruh bröcht warrn kann:
2 Dele Odermennig,
1 Deel Wermut,
2 Dele Brennnettel mischen.

Nu enen groten Teelöpel vull vun disse Mischung
mit ¼ l hitt Water övergeten,
10 Minuten trecken laten,
afseihen,
in lütte Slucke drinken!
To'n Glück heff ik nie wat mit de Gall; denn ik kunn dissen Tee — glööv ik — nich drinken. He is böös bitter. Man he wirkt beter, wenn he nich sööt maakt warrt.