Dat Kruut för'n Heumaand:
Majoran

vun Anke Nissen

Origanum majorana — Familie Labiatae

• As Gewürz
• As Hülp, wenn de Maag nich richtig mitspeelt,
• bi Verdauungsstörungen, Kolik
• Ok to'n Baden...
• ...un in'n Krüderkissen.
• In Majoranbotter to'n Inrieven bi Schnuppen vun lütte Kinner
• In Majoranöl (Oleum majoranae)

Ok in't olle Ägypten weer dit Heilkruut bekannt. Na Europa is't in't Middelöller kamen.

De Fruun hebbt sik Duftbuschen dor ut bunnen.
Un Oleum majoranae (Majoran-Öl) hebbt se sik in't Baadwater drüppelt.
Möbel ut Ekenholt un Footbodden hebbt se so lang mit Majoranbläder reven, bet dat en duften Politur geev.

In en oll Krüderbook heff ik leest, man hett dortomalen Lüüd, "die zu übermäßigen Klagen neigten", Majorantee to drinken geven — dorher kümmt villicht de Naam "Wohlgemut", in dat oll Krüderbook steiht "Wolgemüt".

Majoran gell as Kruut gegen Hexen. Al siet de Antike warrt geern Hüüs un Stall dormit utrökert.

In de Köök

Bi uns warrt al lang Majoran as dröögt Bläder in de Köök bruukt.
Man ok frisch Majoran warrt in Pötte orrer in Goorn bi uns plant. Majoran mag veel Sünn.

Wi hebbt Majoran in unsen Goorn. Ik streu jichtens Majoran över de Braatkantüffel, kort bevör de to Disch kaamt.
As de Naam "Wustkruut" al seggt, smeckt Majoran bannig goot in Leberwust, aver ok in Blootwust un Braatwust. Dit Kruut lett de Wust länger wohren.
Ok to Swienfleesch is Majoran goot to bruken, in Eintopf-Eten, bi herzhaft Spiesen mit Appeln, to Goosbraden.
Wenn ik Majoran mitkaak (nich to lang mitkaken!), as Bispill in en Eintopf-Eten, denn röög ik to'n Sluß — wenn't to Disch geiht — noch mal frisch Majoran-Bläder ünner.

To all fett Eten passt Majoran, wiel dit Kruut goot för dat Verdauen is.
Majoran verdriggt sik wunnerbor mit Bohnenkruut.

As uns' Kinner noch heel lütt weern, heff ik ehre Näsen mit Majoranbotter insmeert, wenn se Snuppen harrn. Uns Dochter hett dat mit uns' Enkel later jüst so maakt.

Majoran-Saalv:

• 1 Teelöpel Majoranbläder in'n Mörser twei drücken,
• mit 1 Teelöpel Wiengeist vermischen,
• poor Stunnen trecken laten.
• Denn 1 Teelöpel Botter togeven.
• In'n Waterbad warm maken, bet de Botter smolten is.
• De Mass dörch en linnen Dook afseihen (ik nehm en Stoff-Daschendook).
• Koolt warrn laten.

Blot jümmers lütte Portion herstellen, höllt sik nich lang!

Mien Oma hett Majoranbotter ok nahmen, wenn en Baby jümmers an't Schrien weer. Se hett tweemal an'n Dag en Fingerspitz Saalv vörsichtig üm de Navelgegend vun't Kind inreven.

"Wilder Majoran" is as Oregano bekannt. Dat gifft — so as bi Majoran — vele Arten. Den Ünnerscheed süht een an de Bläder, mal sünd se grötter, mal lütter, mal seht se mehr rund ut, mal as en Hart, mal länglich.

Oregano blöht recht smuck.

Anner Namen för den Wilden Majoran:
Origanum vulgare,
Baadkruut, Bergminze, Bergmüntz, Blauer Dunst, Braundosten, Dost, Dosten, Hoher Kaspar, grober Kostens, Orant, Organ, schwarzes Ruhrkraut, Wilder Balsam.
To bruken is Oregano as Gewürz, un dor denn jüst so as Majoran.