Hopfen
Humulus lupulus,
Familie: Maulbeergewächse (Moraceae)
Unterfamilie: Hanfgewächse (Cannabiaceae)

vun Anke Nissen


Sammelt warrt: Flores Humuli Lupuli, also de Böden (Blödenzapfen), in'n Harvst
So warrt't bruukt:
  • as Würze bi dat Herstellen vun Beer
  • as Hopfentee, maakt ruhig, bringt Slaap, drifft Water, stärkt den Maag
So warrt't anwennt:
  • 10 g dröögt Hopfenzapfen för een Tass Tee nehmen.
  • As Mittel to'n Slapen warrt de Tee kort upkaakt
  • As Help för den Magen warrt de Tee kolt anset


Ik höör, dat uns Naversch in'n Goorn nevenan togangen weer. Se maakte sik wohl över dat her, wat wi geern Unkruut nöömt. Un denn schimp se luut: "Ach nee, jümmers dit oll Rankeltüüg!" Un as ik fraag:
"Wat argert se denn so?" Dor klaag se: "Hebbt Se denn nich ok all den velen Hopfen up Ehre Siet? Man kriggt den Kraam gor nich in'n Griff."

Hm, Naversch hett ja Recht, de Hopfen maakt sik bannig breet, geiht över Busch un Tuun. He kümmt vun ehre Siet, nich vun uns. Ik versöök se to beruhigen: "In'n Harvst starvt doch all de Plantendele af, de baben över de Erd wasst. Denn is Ruh."

"Sünd Se seker?", fraagt se. Ja, ik bün mi tehmlich seker.

Mien leef Mann un ik, wi weern mal en beten ünnerwegens. Wieder weg na Süden to. Dor kemen wi dörch Feller, de beten afordig utsehgen. As harrn de Lüüd dor luter höltern Wäschespinnen upstellt. Un dor rankel Grööntüüg an hooch. As wi anhöllen un uns den Kraam bekeken, dor weer dat Hopfen, de dor an't Wassen weer. Hopfen, de nödig bruukt warrt, wenn Beer bruut warrn sall.


Hopfen in'n Wald. In welk Richt he dreiht, is swoor to kennen. Bild Anke Nissen, klick up to'n Vergröttern!

Hopfen is en utduurn Slingplant. Se warrt 3-6 Meter lang. Se windt sik rechts rüm ("rechtswindend", heet dat). De mehrsten Slingplanten dreiht sik so rüm oder so rüm. Nich dat Se nu denkt, dat is as mit de Deepdruckrebetten, de sik rechts rüm dreiht: rechte Fuust, Duum na baven, de Richt vun de Dreihn is denn so as de Fingers. Nee, de Definition bi Slingplanten is anners, gor nich eenfach. Kannst hier nalesen.

Hopfen kümmt bi uns in de frie Natur vör — in Hecken, Gebüsch, an'n Rand vun'n Wald kannst em finnen.

 

 

 

 

Hopfen is ok as Heilplant bekannt. En Tee vun'n Hopfen warrt as Slaapmittel drunken, sall den Minschen to Ruh bringen.

As Droge warrt blots de Blöden vun de weiblichen Plant bruukt. Disse Blöden sünd geel-gröön, seht ut as Zapfen (Hopfenzapfen = Strobuli Lupuli).


Dat Blatt vun'n Waldhopfen. Bild Anke Nissen, klick up to'n Vergröttern!

En Kissen, dat mit dröögt Hopfenblöden füllt is, warrt geern as Slaapkissen bruukt. Na een Woch is dat denn aver vörbi mit dat gode Wirken, denn sünd de Blöden "verbruukt". Denn mütt dat Krüderkissen mit anner dröögt Hopfenblöden weller nieg füllt warrn. Ik sülm mag de Slaapkissen nich so geern. Ik meen, dat stofft jümmers beten wat.

In miene ollen Krüderböker heff ik den Hopfen natürlich ok funnen. In Leonhart Fuchs sien Kreutterbook vun 1534 steiht:

Des Hopffen seind zweyerley geschlecht /
Zam und wild/
Wie wir hernach weiter wollen anzeygen.
Der zam würt mit großem vleiß an ettlichen orten gepflanzt.
Der wild kompt von jim selbs.


Hopfen in'n Wald. Bild Anke Nissen, klick up to'n Vergröttern!

Plinius hett blots schreven, dat Hopfen an Wicheln rupklattern deit. — De olen Römer verstünnen even veel vun Wien, aver nix vun Saken, de man för Beer brukt!

Albertus Magnus meent, dat Hopfen "die Melancholie und das schwere Gemüt aus dem Leib vertreibt".
Ok Hillig Hildegard hett Hopfen as Heilplant ansehn.

De Mönche weern dat denn wohl, de den Hopfen to dat Beer geven hebbt. Ik weet nich, woso se dat daan hebbt, as Gewürz — orrer wiel se dachen, Hopfen hett sowat as en konservieren Wirkung. Op jeden Fall hett sik dat as en gode Idee wiest!

 

 

 

Hopfen kann helpen, wenn de Mensch wat unruhig is, wenn he vull vun Bangen sitt un wenn he nich slapen kann.
Tee, de dorgegen helpt:

  • 1 Teelöpel dröögt Hopfenzapfen
  • Mit 1 Tass kaken Water övergeten
  • Todecken
  • 10 Minuten trecken laten
  • Afseihen.
  • Middags un avends een Tass vull dorvun drinken.

    För dissen Tee kann een ok den Hopfen mit Baldrian orrer Melisse mischen.

Waldhopfenblatt. Bild Anke Nissen, klick up to'n Vergröttern!

Kortens weer ik mal weller mit unsen Förster in'n Wald. In Wessloh. Un wat findt wi? Binah mirrn in'n Wald? Hopfen! Hopfen, de sik an enen Boom hochrankel. En beten wat kümmerlich sehg disse Hopfen ja ut. Man ik heff trotzdem mal en Photo mitbröcht.

Wi wüllt höpen, dat de Hopfen sik as en gode Gast för sienen Boom wiest un em nich de Luft afdreiht as de Efeu. Weer schöön, wenn beid leven blieven kunnen, Hopfen un Boom.

 
 

Bilder för Ranke: Manfi B. /Wikimedia Commons
6.9.2015


na baven