Kopp vun'n opwussen Kormoran

Swatte Gesellen:
Kormorane

vun Antje Heßler

De Kormoran is en Watervagel mit en dichtes swattes Fedderkleed. Dorüm betekent man em ok as "Seeraav". De Jungvagels hebbt noch en bruun Fedderkleed un enen hellen Buuk.

Sooo groot un so swatt is de Kormoran!

He tellt to de Ruderfüßler, denn sien Fööt sünd mit Swimmhuut utstaffert. Dat is en teemlich sworen un groten Watervagel. He kann bit to 1 Meter lang warrn. Up de Waag bringt he bit 2800 Gramm. Sien Freten besteiht in de Hauptsaak ut Fisch. Un he bruukt veel Fisch. Däglich vertilgt he 300 bit 500 Gramm.

Jungdeert (links) un Ooltvagel in't Water: Hier maakt se en gode Figuur...

In't Water bewegt sik de Kormoran elegant, dorgegen is he an Land böös swoorfällig. De Ruderfööt sünd even för't Water maakt! — Up de Jagd na den Fisch dükert he mit enen Koppsprung deep ünner Water. Dorbi sett he beide Been as Paddel in. Bi dat Dükern hett he de Flunken dicht an den Rump anleggt. De Steert deent em as Roder. So kümmt he bit to 10 Meter deep ünner Water.

...aver an Land gifft't bloots noch eens: Haltung bewohren! — Jungdeert (links) un Ooltvagel (rechts)

Na dat Dükern dröögt he sien Fedderkleed. Dorto breet he de Flünken wiet uteenanner. Achterna smeert he de Feddern mit Fett ut de Bürzeldrüüs akraat in. Will he flegen, mutt he enen ganz langen Anloop över dat Water nehmen. Sien Rump is eenfach to swoor. He liggt bi't Swömmen deep in't Water.

Kormoran-Startversöök: De Kormoran is de A380 ünner de Watervagels

Kopp vun'n Ooltvagel: De Oogen sünd wohraftig gröön

Kopp vun'n Jungvagel: De verdreetliche Utdruck is anboren

Sien Levensruum is in de Neegde vun de Küsten. He is an Dag aktiv. In de Nacht höllt he sik an Land up Bööm un Klippen up. Dor leevt de Kormorane in grote Kolonien. Al vun Wieden kann man utmaken, wo sik de Kormorane upholt. De Kot vun de Vagels farvt de Bööm grieswitt.

Nich bloots de Bööm warrt witt vun Kormorankot. "Pfft! Mi doch egaal", seggt de Kormoran

Dütt Johr is nu de Kormoran vun den Nabu to'n "Vagel vun dat Johr 2010" utsöcht woorn. Dat hett för groten Larm un Protest bi de Fischer un Fischtüchter sorgt. Se hebbt Bang, dat de Fischbestand dörch de Kormorane to dull afnimmt. Seltene Fischoorten, as de Äschen, wöörn dörch den Fischröver utstarven. Alleen in Europa sall dat 2 Millionen Kormorane geven.

Jungvagel un Ooltvagel swömmt en kunstvulle Kormoran-Quadrille

Nu woor up de Johresvageldagung in Ulm an'n 20. März 2010 verhannelt. Dor hebbt üllt se diskereert, up de Komorane to'n Afschuss friegeven warrt. Se kunnen nich up een Brett kamen. Hier kannst nalesen.

He kiekt jümmers so konsterneert

Swatte Gesellen

Up den Anlegger in'n Fischereehaven stünn he, uprecht un groot, en swatten Gesell! He keek mi mit smaragdgröön Ogen an. Sien Fedderkleed glänz as Metall. De grote, vörn na ünnen bagen Snavel wies na mi. Kunnst meist bang vör warrn. So ut de Neegde harr ik em noch nie sehn. Dat weer en Kormoran.

"Bitte keen Mitleid! Lever Fisch!"

Düssen Winter harrn de swatten Gesellen dat besünners swoor. De Trav weer deelwies to mit Ies. Se seten in'n Fischereehaven up de Iesschollen oder up de Brüchen. Leten mi dicht an sik ran. Ik kunn se goot knipsen. Se kunnen dörch dat Ies nich na Fisch dükern. Lungern dorüm mit anner Watervagels bi de Fischkutter na Fisch.

Kennen do ik düsse swatten Gesellen al lang. Ümmer wedder hebbt se mien Upmarken up sik trocken. Stolt, binah vörnehm staht se meist up de Brüchen oder de Poller an't Water. Luurt mit ehr gröön Ogen na Fisch. Warrt se enen gewohr, breed se ehr groten Flünken ut un stört sik in't Water. Na'n ganzen Stoot kaamt se mit en Fisch in'n Snavel wedder to'n Vörschien. Den helen Fisch würgt se den langen Hals hindaal. Kannst tokieken, wo he graad steken deit.

Film: "De Kormorane". Regie: Alfred Hitchcock

Harrn se noog Fisch fungen, stünnen se wedder up de Poller oder de Brüch. Breden ehr groten Flünken to'n Drögen wiet uteenanner. Dat sehg besünners smuck ut. Kunnst meist an en Aadler dinken.

Dat eerst Mal sehn heff ik welk vun düsse swatten Gesellen in de söventiger Johrn. Wi schippern mit uns Boot na Niendörp. Dor seten welk up de Pahls, nehm de Fischer ehr Netten utleggt harrn, un luurn na Fisch. Vull Höög hebbt wi to Huus vun uns Beobachten vertellt. Korte Tiet dorna sünd wi denn de eersten Kormorane up en Badesteeg in Tramünn wies woorn. Ümmer weer uns Freud groot, wedder de swatten Gesellen to sehn.

Swatt un Witt: Kormorane (links achtern) un Swaans

Vele Johrn sünd in't Land gahn. De Kormorane hebbt bannig tonahmen. In Fischereehaven luurt meist up jedeen Poller en swatten Gesell. Kaamt de Fischkutter mit Fisch in den Haven, fallt se över den Bifang un Affall her. Geihst du hüüt de Promenaad lang, kannst du bit to hunnert swatte Gesellen up de Badbrüch tellen. In en lang Reeg sitt se up dat Gelänner un de Planken. Dor is keen Placken mehr frie. All luurt se up Fisch. Welk dröögt ok ehr Fedderkleed.

De afsturven griesen Bööm in'n Achtergrund sünd de Kormoran-Bruutbööm

Sühst du de velen Kormorane, de all na Fisch luurt, kannst di de Bang vun de Fischer üm den Fischbestand vörstelln. För mi is de Kormoran aver liekers ümmer wedder en besünners intressanten un smucken Vagel. To geern harr ik mi mal so en Bruutkolonie ankeken. Aver de liggt swoor togänglich an den Dassower See in en Natuurschutzgebiet. Vun Wieden kunnen wi de mit Koot beklackerten witten Bööm utmaken. Leider kunnen wi dor nich hin.