En wilde Dissel — de Wilde Karde

vun Antje Heßler

Genau gegenöver vun mien Huusdöör steiht en Dissel.

Se weer meist twee Meter hoch, weer nich to översehn un harr griesgröne Bläder. De Plant weer mit Stickeln överseit un sehg en Dissel liek. Se tell aver to de Kardenfamilie. Bit se de Grööt vun twee Meter harr, vergüngen twee Johr.

De Karde as Water-Reservoir

Direkt an jeden Stengel wussen bit baben ümmer twee lange Bläder, dicht mit Stickeln besett. De weern an'n Stengel to en lütten Pott tosamen wussen. Dor sammel sik na Regen dat Water. Lütte Insekten kunnen mit dat Water ehrn Döss löschen. Man seggt, dat sogoor Wanderer sik den Döss löscht hebbt.

Hummeln un anner Vagels fröhstückt geern an de Karde

De lütten zartlila Blöden seten an en groten eiförmigen Blödenkopp. Se möken nich gliektiedig ehr Blöden up. Toeerst weern se as en Buukbinn in de Meern vun den Blödenkopp to sehn. Dorna güngen eerst de Blöden an dat bavere un dat ünnerste Enn up. De Blöden locken Insekten un Bottervagels an.

De drögen stickeligen Kardenköpp nehm man fröher to'n Kämmen vun Wull (dorher de Naam "Karde"). Dat weer en wichtig Vörbereitung to'n Spinnen. Hüüt kämmt man de Wull mit Maschinen. Ok to'n Bössen von weevte Wulldöker wöörn de Kardenköpp bruukt.

Karden-Keed

Vör veele Johr'n weer ik in Nimünster in dat Tuuchmuseum. Dor kunn ik de drögten Kardenköpp, de to'n Kämmen weern, bewunnern. Ik seh dat Bild noch genau vör mi. — Nu heff ik versöcht, de drögen Köpp vun de wilde Karde up en Stricknadel to steken un so enen Kamm natomaken.

Ok kenn ik de dröögten Kardenköpp vun to Huus. Dor hebbt se uns to Wiehnachten as Verzierung för den Adventskranz deent. Mank dat Dannengröön heven se sik goot af.

De wilde Karde weer ok en Heelplant, aver teemlich unbekannt. Sietdat man rutfunnen hett, dat de Tinktur ut ehr Wöttel gegen Borreliose hölpt, findt se mehr Upmarken. De Tinktur un de Tee ut de Wötteln vun de Karde warrd ok to Verdauung un gegen rheumatische Krankheiten insett.

Junge Kolben mit Stickeln

De wilde Karde is nich blots en upfallend un dekorativ Plant, se findt ok veelfach en anner Verwennung.

Ja is denn heut schon Weihnachten? — Süht so ut!