De Japanknöterich blöht!

Noch en Neophyt — de Japanische Staudenknöterich

vun Antje Heßler

Vör en poor Weken keem in't Fernsehn en Sendung över de Planten in uns Goorns. Wat sik dor allens breet maakt! Vun Neophyten weer de Spraak. Dat drüsige Springkruut un den Japanischen Knöterich harrn se besünners up'n Kieker. Dat sünd bi uns al Problemplanten. De Japanische Staudenknöterich warrt geern as gröne Grenz anplant. Leider nimmt he gau Överhand.

Bläder vun'n Japanknöterich

De Scheckenfalter, wenn he laat in't Johr to Welt kümmt,
is froh över den laat blöhen Knöterich

Vör veele Johr'n hebbt wi mit den Schlingknöterich, een ut de Familie vun de Knöterichs, uns Beleevnis hat. Wi harrn för uns Warktüüch en lütt Goornbood upstellt. De muchen wi aver nich so recht lieden. Dor meen uns Naver: "Pflanzen doch Schlingknöterich an die Bude!"

De Slingknöterich in Aktion — "Architektentroost", na wiss doch!

Knöterich leevt dat Water un landt dor överall

Wi hebbt den Rat befolgt. Aver na twee Johr harr de Slingknöterich nich blots de Bood todeckt, ok Büüsch un Bööm dorneven harr he verslungen. De Slingknöterich driggt ok noch den Ökelnaam "Architektentroost", deckt he doch gau alle Bufehler to. Wi harrn uns leev Möög, em wedder uttobuddeln.

De Warnung, de wi övert Fernsehn höört harrn, kunnen wi goot verstahn. Dor güng dat aver üm den Japanknöterich un nich üm den Slingknöterich. Ut de Familie vun den Knöterich gifft noch veel anner Oorten. Ik kenn noch den Flohknöterich un den Waterknöterich. Mit den Teppichknöterich heff ik slechte Bekanntschop maakt. De hett mien smucken Steengoorn total överwuchert.

Teppichknöterich in'n Steengoorn

Kopfknöterich

Flohknöterich

Japanknöterich, hooch as en Wand

Taag sünd wull alle Knöterichplanten. Aver se sünd nich ümmer so groot as de "Japanische Staudenknöterich". Wenn man mit apen Ogen dörch de Goorns un de Natuur geiht, süht man veel Hecken un Tuuns vun den Japanknöterich. De sünd oftins över twee Meter hoch. He steiht in Oogenblick överall in vulle Blööt. För de Imker is dat in Fröhharvst nochmal en richtig "Bienenweide". Gifft villicht bald Knöterichhonni!

Blödenrispe vun'n Japanknöterich

"Nest" vun Knöterichstängels

Na den eersten Frost smitt de Japanknöterich allens, wat över de Eer is, af. En poor ole Stängels blievt stahn. De seht meist Bambusstöck liek. De Plant överwintert in de Eer mit wuchernd Wöttelwark. Ut de Wötteln wasst in kamende Johr niege Planten.

Noch so en "Nest"

Dat sünd Planten un keen Büüsch, liekers se so groot sünd as Büüsch. Besünners veel staht an lütte Beken. Man mütt uppassen, dat se nich Överhand nehmt, denn sünnerlich an't Water gifft dat en weertvull un veelsiedig Ökosystem. Kümmt de Japanknöterich, denn gifft dat bald bloots noch Japanknöterich...

Japanknöterich mit Meer un 1 Japaner, de nich so knöterig is