Kringnäwel M57 —
mit Draokenooge nauer seihn

van Ludgerd Lüske

Dat James Webb-Teleskop hett mit sien Draokenoge dei eiersten Fotos schaoten, dorünner ok den Kringnäwel Messier 57 (kort: M57), ok NGC6720 nöömt.

Drei Weltruumteleskope knipst M57. Infos tau dat Spitzerteleskop hier.

M57, dei Kringnäwel, is ein planetorischken Näwel. Man süht lüchten, wat van einen Sünnen-Stern äöwer bleef. Dei orig lüttke, witte Punkt in dei Näwel-Midde is dei heite Stern-Karn, dat is ein witten Dwarg. M57 ligg üm dei 2000 Lechtjohre wiet aff van hier in dat Sternbild Leier. Man süht üm meist in'n August. 1779 fünd dei französke Astronom Antoine Darquier de Pellepoix den Kringnäwel. Dei hätt eine Schienbore Helligkeit van 8,8 mag un man süht üm mit middelgroote Teleskope.

Sternbild Leier mit den Kringnäwel M57. Bild-Daoten: Wikipedia

M57 is nao dei Eern tau buugt, so käönt dei Astronomen den Kring van vörne seihn. Dit wunnerbore, hooch uplöste Hubble-Bild hülp dei Astronomen bi't Rutfinnen, dat in dei Näwel-Form mehr los is, as man vörher dachde.

M57, knipst van Hubble. Bild-Daoten: NASA

Dat blawe Gas in dei Näwel-Midde is mehr ein Fautball, den man dor süht un dei sick dör dat roe Materiaol recket. Dei Binnenkante van den Kring wiest einen Upbau ut düstere, huckeligge Knüppens ut dichtet Gas, dei dei Sternenwinde noch nich wegpußen kunnen. Disse Knüppens mit ehre Steerde laotet as Speeken in ein Rad.

Dit Bild van M57 wörd so infarwet, dat man den chemischken Upbau van den Näwel bäter seihn kann. Dei düsterblawe Farwe in dei Midde staiht för Helium, dei lechtblawe Farwe in den Binnenkring is dat Lüchten van Waoterstoff un Suurstoff. Dei rot schienen Farwe in den Buutenkring kummp van Stickstoff un Schwäwel.

Hier nu dei Biller van twei Kameras an James Webb:

Messier 57 (Dei Kringnäwel) | NASA

Dat Bild van dei NIRCam (Naohes Infrarot) grötter

Twei Sterne, dei einen engen Ümloop häbbet, hollt binnen dei Landschup ünner sick. Dei Infrarotbiller van Draokenooge wiest neie Einkeldeile in dit System. Dei Sterne mit ehre Lechtlaogen süht man an dei lünke Hand up dat Bild van dei Naoh-Infrarot-Kamera (NIRCam). Dat Bild van dat Midde-Infrarot Instrument (MIRI) up dei rechte Siete wiest tau'n eiersten Maol, dat dei tweide Stern einen Hoff ut Stoff hätt. Dei lechte Stern is in einen freuhen Taustand in siene Stern-Entwicklung un schall woll in dei Taukunft sienen eigen plaonetorischken Näwel rutpuußen.

Hier süht man tau'n eiersten Maol twei Sterne in den Kringnäwel. — Dei taukaomen Upnaohmen van James Webb warrt uns noch vele Details ut dei deipsten Ecken van't Weltall wiesen!

Originaol-Artikel: NASA
SO-Platt: Ludgerd Lüske