Draokenooge ünnersöch den Exoplanet WASP-96

van Ludgerd Lüske

Dörgangs-Lechtkurve van den vörbitrecken Exoplanet WASP-96.
Bild-Daoten: Lüske nao: DO-Billersammlung

Eine Lechtkurve van den Draokenoge-Naohinfrarot-Bildwannler un den Gliewlosen Spektograoph (NIRISS) wiest dat Ännern van dei Lechtstraohlung ut dat WASP-96-Sternsystem mit dei Tied, wenn dei Planet vör den Stern langers löpp. Dat Beobachten van dat Lecht van ein Stern is dei Methode, mit dei Planeten, dei üm den Stern kreist, an lichtsten opfunnen warrt. Wenn sick ein ümmloopen Planet tüschken den Stern un dat Teleskop bewägt, is dat ein so nöömte "Transit". Dorbi werd ein Deil van dat Stern-Lecht affdeckt. Dit Mäten mök man mit mit den Einkel-Objekt Gliewlos (SOSS)-Spektroskopeier-Modus van NIRISS, wobi man dat Spektrum van ein einkeln lechtet Objekt at dei Stern WASP-96 in ein Sichtfeld faotet.

Bi dat Faoten van disse Daoten keek Draokenoge stuur 6 Stünnen un 23 Minuten up dat WASP-96-Sternsystem. 2 ½ Stünnen vör den Transit güng et los, un uphörn dö dat bold 2 ½ Stünnen nao dat End van den Transit. Dei Transit sülwes duurde knapp 2 ½ Stünnen. Fö dei Kurve mök man tausaome 280 Mätpunkte bi dat Mäten van dei Helligkeit — einen aale 1,4 Minuten.

Siedenansicht van NIRISS. Bild-Daoten: Lüske nao WEBB/NASA

NIRISS-Apparaot, Neern-Ansicht. Bild-Daoten: Lüske nao STScI

Süh uck düsse twei Videos dortau: Video-1 un Video-2.

Dat Ünnerseuken mök man mit einen Spektrograoph, dei dat Lecht up Hunnerte van einkelne Wellenlängten verdeilt. Dorbi wiest aale 280 Punkte up dei Graophik dei tausaomesette Helligkeit van Duusende van Infrarot-Wellenlängten. Dat würklicke Dimmen dör den Planet is orig minne: Dei Unnerscheid tüschken den hellsten un den düstersten Punkt is minner as 1,5 Prozent. NIRISS is för dit Ünnerseuken bei beste Apparaot. Dei kann lechte Objekte äöwer eine wisse Tied unnerseuken, tausaome mit dei Empfindlichkeit, dei nödig is, tau'n Mäten van sücke lüttken Ünnerscheide bi dei Helligkeit: Bi dit Ünnerseuken kunn dat Instrument Helligkeit-Unnerscheide van blots 0,02 Prozent mäten.

NIRISS-Bauplaon. Bild-Daoten: Space Telescope Science Institute (STScI)

Wenn man uck Utseihn, Grötte, Masse un den Ümmloop van den Planet dör freuher faote Transitwerte kennt, kann man mit disse Transit-Lechtkurve dei vörher funnen Daoten, as den Planet-Dörmäter, dei Transit-Tied un dei Planet-Baohn-Eigenschkupen nauer un fiener faoten.

WASP-96 b is ein heiten Gasriesen-Exoplanet, dei üm einen bold 1150 Lechtjohre affgelägen, sünnenähnliken Stern in dat Sternbild Phönix löpp. Dei Planet löpp orig duune üm sienen Stern (minner as 1/20 van den Eerd-affstand tau use Sünne), un hei löpp siene Baohn in minner as 3 ½ Eerd-Daoge. Den Planet fünd man all 2014 mit Eerdstännige Teleskope.

Bild-Daoten: aale nao STScI

NIRISS is sünners för dei Transit-Spektroskopie optimeiert. Dorbi löpp dei Lechtstraohl dör eine utsöchte Kombination van Blenden- und Filterrad, dei dei lechtminnern Optischke Gliewe ersetten dait.

Dat Bild-Dorstellen van WASP-96 b un sienen sünnenähnliken Stern maokt man mit dat Wäten äöwer den Planet. Dorbi nimmp man Daoten ut dei NIRISS-Spektroskopie un uck ut öllere Daoten van Eerdstännige- un Weltruumteleskope. Draokenoge mök aower kien direktet Bild van den Planet off siene Atmosphäre. NIRISS wörd van dei Kanadischke Weltruum-Agentur in Updrag gäben.

Eine vulle Riege van dei eiersten Draokenoge-Biller un -Spektren, uck Dateien tau'n Daollaoden, finnt man hier: Biller van Draokenooge