Dei duune biliggen Stern-Entstaohregion, NGC 1333. Dei Näbel ligg in dei Perseus-Molekülwulke un is bold 960 Lechtjohre van us weg. Bild-Daoten: NASA

Hubble ünnersöch 33 Johre den Weltruum

van Ludgerd Lüske

Dei Astronomen fiert den 33. Startdag van dat NASA-Hubble-Teleskop mit ein ätherischket Foto van eine duune biliggen Stern-Entstaohregion, NGC 1333. Dei Näbel ligg in dei Perseus-Molekülwulke un is bold 960 Lechtjohre van us weg.

Dei moje, farwige Ansicht, ein wunnerboret Bild in dat Hubble-Upnaohmespektrum van ultraviolett bit nao dat naohe Infrarot, wiest einen kaoken Kädel ut gleihen Gase un pick-schwarten Stoff. Dei werd hier van väle hunnert nei entstaohn Sterne, dei in dei düstern Wulke ligget, dörnanner dräben un wegblaost. Hubble süht dorbi lange nich aals, wiel dei gröttste Sterndeil, dei den Füerstorm andriff, achter Wulken ut fienen Stoff — meist Sott — verstäken ligg. Neern in't Bild sünd dei noch dicker. Dat Schwarte in't Bild is kien losen Ruum, dei is vull mit orig düstern Stoff.

Bi dei Upnaohme van dit Bild spekuleierde Hubble dör einen Stoffvörhang an dei Kante van eine gewaltige Wulke ut kolden, molekukoren Waoterstoff — dat Bawmateriaol för dat Herstellen van neie Sterne un Planeten ünner dei orig stark antrecken Schworkraft. Dat Bild wiest, dat dei Prozeß bi dat Entstaohn van Sterne chaotischk afflöpp in use wilde Universum.

Dei Lechtblawe Stern blaost Sternwinde. Bild-Daoten: NASA, utschnäen

Starke Sternwinde, dei kaomt woll van den blawen Stern baoben in't Bild, weiht dör einen Vörhang ut Stoff. Dei fiene Stoff streiet dat Sternlecht bi blawe Wellenlängten.

Dei superheite Stern achter düstere Stoff-Födens. Bild-Daoten: NASA, utschnäen

Wieder neern lüchtet ein annern lechten, superheiten Stern dör Fäödens ut düstern Stoff un süht ut at dei Sünne, dei dör utstreite Wulken schinnt. Eine schraot loopen Käen ut schwacke Bisterne süht rötlick ut, wiel dei Stoff dat Sternlecht filtert un mehr Rotlecht dörlätt.

Dei rotlüchten, ioniseierte Waoterstoff in dat Näbellock. Bild-Daoten: NASA, utschnäen

Neern in't Bild kann man dör ein Schläödellock kieken, deip in den düsern Näbel rin. Hubble fang dat rötlicke Lüchten van den ioniseierten Waoterstoff in. Et lätt at ein Füerwarkfinaole mit dörnanner fleigen Deile. Dat kummp van bleifedderdünne Jets, dei van nei entstaohn Sterne butsiet van den Sichtraohmen rutscheitet. Disse Sterne häbbt kringortige Schiewens üm sick, dei tauleßte Planetensysteme maoken käönt. Un sei häbbt starke Magnetfelder, dei twei parallele Straohlen ut heitet Gas deip in den Weltruum schickt, at ein dubbeltet Lechtschwert ut Science-Fiction-Filme. Sei formt Musters up dat Waoterstoff-Netwark, at Laser-Lechtshow-Spauern. Dei Jets künnigt eine Sterngeburt an.

Disse Ansicht is ein Bispill för dei Tied, at use Sünne un Planeten vör 4,6 Milliarden Johre in so eine stuuwige Molekülwulke entstünnen. Use Sünne is nich allennig entstaohn, sei hüng in einen Chaos-Pott, vull mit entstaohn Sterne, dei vellicht noch mehr Energie un Materiaol har at NGC 1333.

NASA-Astronauten bröchden Hubble an'n 25. April 1990 an Bord van Space Shuttle Discovery in den Erdümloop. Bit vandaoge hätt dit beneumte Teleskop bold 1,6 Millionen Biller van bold 52000 Himmelsobjekte maokt. Dit Wäten äöwer dat Universum werd öffentlick verwohrt in dat Mikulski-Archiv för Weltruumteleskope an dat Space Telescope Science In-stitute in Baltimore, Maryland.

Dat Hubble-Teleskop ünnersöch all 33 Johre den Weltruum. Bild-Daoten: NASA

Dat Hubble-Weltruumteleskop is ein internationaolet Projekt , wobi dei NASA un dei ESA tausaomewarket. Dat Goddard Space Flight Center van dei NASA in Greenbelt, Maryland, bedriff dat Teleskop. Dat Space Telescope Science Institute (STScI) in Baltimore, Maryland, hätt dat Leit äöwer dei Wätenschkup-Operationen von Hubble und Webb. STScI werd för dei NASA van dei Association of Universities for Research in Astronomy in Washington, D.C. bedräben.

Süh uck hier (up Englischk): Youtube-Video