vun Berthold Cordes

Wo veel Freid maakt dat doch, bi Sünnenschien dörch den Goorn do gahn un antokieken, wo allns so wunnerbor bleiht! Sünners de Blötenpracht vun de Hortensien fallt een toeerst in't Oog. Keen Wunner, denn mien Fro hett al fröh dormit anfungen, mit veel Mööh un Arbeit den Goorn to en lütt Paradies trechttomaken.

Un denn lees ik doch morgens bi't Fröhstücken in de Zeitung: "Jümmer mehr Goornfrünn un Goorner mööt Angst hebben üm jümehr Hortensienpracht. Dor schall dat doch wohrhaftig Lüüd geven, de disse Blomen eenfach ut den Goorn klaut."
Deveree vun Blomen, gifft dat redig? "Ja", meent mien Fro, "uk bi uns sünd se al togang ween un hebbt dor düchtig in rümwöhlt!"

Worüm klaut een Hortensien? Nu, de Grund dorför schall ween, dat eenige Minschen glövt, dat Roken vun dröögte Strünk un Blöten is as en Droog. Dat dat Smöken vun dröögte Hortensien jüst so ansleiht as bi Cannabis, dat is för de Lüüd ut de Wetenschop aver woll twiefelig. Dorüm is uk de Gebruuk keen Unrecht — dat Klauen aver doch!

Uns Goorn hett Togang to en Woold, en lütt Holtdeel, dat an den Goorn angrenzt. Schull vun dor woll en Röver sien Undöög drieven? Dat wüllt wi weten — un stellt en Fotokamera op. An'n neegsten Dag hebbt wi den Röver op't Bild: Stolt geiht en Reh in den Goorn, jüst op den Hortensienbusch to.

"So," dinkt wi, "dat deiht dat Reh seker nich, üm sik to beruuschen, sünnern wiel't hungerig is." Aver uk dorvör warnt de Fachlüüd, denn uk dörch dat Opfreten vun de Blöten kann een en Blausäure-Vergiftung kriegen. De Hortensie gellt nämlich as lichte Giftplant. Cyanidvergiftung! Jungedi, wat sünd de Reh doch för en kriminelle Bande!

Trüch to de, de Hortensien as Droog (Cannabis) anseht. Ok in den Rook vun dröögte Hortensien is Cyanid, dorwegen wohrschuugt de Dokters dorvör. Un jüst vör Korten hett uns Regeren en Gesett beschloten, dat den Gebruuk vun Cannabis in begrenzten Ümfang af en bestimmtet Öller för rechtens verkloort. In Cannabis is keen Cyanid. Worüm also noch disse schönen Blomen ut den Goorn klaun un dat Beet verwöösten?

Dat köönt doch bloots Lüüd maken, de al — naja, teemlich bekifft sünd, oder?