Kuckuck!

Gemeen Efeu un Hornissen

vun Antje Heßler

Wi kennt em all, den gemeen Efeu. Dat is en ümmer-gröön Plant. Överall kruupt de jungen Efeuplanten mit ehr Ranken över de Eer.

De Efeu deckt de Eer regelrecht to, oft to'n Arger vun de Goorners.

Ümmer wedder wunner ik mi, wenn so'n lütte Plant över de Eer krüppt. Mit sien Ranken wuchert he över allens, wat em in den Weg kümmt. Steiht dor en Boom, kladdert he mit sien Suugwöttel na baven. He klammert sik fast an den Stamm.

Oles Muurwark warrd vun den Efeu vullstännig överwuchert.

En Plant will na baven

De Efeu in Blööt

Bi mien Naver bedeckt de Efeu en Wand vun sien Huus. Dat is en wunnerbor ümmergröön Wand. Is de Efeu denn öller, kriggt he vele meist kugelrunde Blödenbäll. Blöhn doot se eerst an't Enn vun den Septembermaand bit in den Oktober. Vör den Winter is dor nochmaal för vele Insekten de Disch rieklich deckt.

De blöhen Efeuwand

Blöhen Efeu

Schient de warme Harvstsünn up den Efeu, warrt de Insekten quicklebennig. Dat müss ik mi doch ankieken. Wild-Immen, Wööpsen un Sweevflegen summen in den Efeu. Endlich sett sik mal een daal un leet sik vun mi knipsen.

De Blödenball vun'n Efeu

Denn kemen ümmer mehr anflagen. Een sett sik so richtig breetbeenig up en Blööt. Dat geev en godes Foto!

Hier sünd al fief Besökers to sehn!

Sweevfleeg

Lütt Leckertehn

Wat en stolte Erscheinung!

Mit eenmal leet mi en deepes Brummen direkt vör mien Kopp upmarken. Ik heff mi richtig verfehrt. Twee grote swatte Ogen keken mi an. Dat weern wohrhaftig de Ogen vun en Horniss. De harr sik achter en Efeublatt versteekt.

Wie annagelt bleev ik stahn. De Horniss leet sik aver nich stören. Se krabbel ganz suutje an en Stengel vun den Efeu na de neegst Blööt. Dorbi keek se mi ümmer wedder mit ehr groten Ogen an.

Ik heff richtig de Luft anhollen. Wat weer dat för en smuck Horniss! Seker weer dat en Königin. Rüüch un Kopp weern mit rode Muster utsmückt. Ik kunn mi gor nich satt sehn. Seker bin ik ehr denn aver mit mien Knipskassen to dicht up den Liev rückt. Se böör en Been an, as wull se Tschüüs seggen, un mit deep Gebrumm möök se sik ut den Stoff!

De grootöögige Schöönheit hett ok Hunger

De annern Insekten slecken ümmer noch an de Blöden vun den Efeu. Flögen ümeenanner un verjagten sik gegensiedig. Jedet Insekt wull den besten Placken för sik hebben. Dat güng so lang, bit de Wand mit den Efeu in Schatten leeg. Dor wöör dat de lütten Insekten to koolt.

Winke-winke!