Kimmen-Mission: Alexander Gerst is up den Weg nao dei ISS

van Ludgerd Lüske


Dei Start löp best, at dei 50 Meter hoge Sojus-Rakte dei drei Astronauten up ehre Reisegeschwinnigkeit van 28800 km/h dreew. All 10 Minuten nao dat Affhäwen reisden dei drei Ruumfohrers äöwer 1640 km un kömen up eine Höchte van 210 km. Nägen Minuten lang wörd dat Ruumfohrtüg immer nao eine Sekunne 50 km/h dröcker.

Nao twei Daoge un nao 34 Eerdümlöpe werd dei Astronauten bi dei ISS ankaomen. Dor schäöllt dei för ein halwet Johr ehr Wark daun. Dei Reise is nao den rappeligen Start orig ruhig. Aohne Internet un Statellitentelefons mutt dei Mannschkup mit Funk warken, so daut sei tau fasteleggte Tieden mit dei Boddenmannschkup schnacken.

Dat Andocken mit dei schwäwen Ruumstation ist plaont an'n 8. Juni üm 15:07 Uhr (MESZ). Dei dütschke Astronaut besöch nu tau'n tweiden Maol dei ISS. In sienen tweiden Missionsdeil äöwernimmp Alexander Gerst dat Leit äöwer dei groote Internationaole Weltruumstation.


Bild: Esa/DLR German Aerospace Center/Wikimedia Commons, afännert

Servicemodul (PAO)

Dat Servicemodul driff dat Ruumfohrtüg mit ein SKD-Driewwark an. Binnen in dit Modul sünd uck dei Tanks mit den Driewstoff. Dortau kaomet noch dei lüttken Stüerdüsen. Dat Energieversorgungssystem is uck in dit Servicemodul un bestaiht ut Solarflünke un Akkumulatoren. Moderne Sojus-Ruumschippe häbbet 10,60 m lange Solarpaneelen mit 10 m². Dei häbbet bold 1 kW Leistung. Dormit bedriff man dei Bordelektronik.

Start-/Landemodul (SA)

Dat Start-/Landemodul hätt besünnere Astronautensitze mit dei Läbensversorgung, mit dei Stüer- un Fallschernsysteme. Dat Modul is 2,24 m lang, hätt einen Dörmäter van 2,17 m un dat Waohnvolumen is 3,5 m³ groot. Buten ümtau is ein affschmelten Hitteschild upbacket, dat nao dat Upspringen van dei Fallscherme afffallt. Unner dat Hitteschild sittet dei seß Faststoff-Bremsdriewwarke, dei kort vör dat Upsetten zündet un dat Modul up 2 bit 4 m/s affbremset. Up dei Baobensiete van dei Kapsel sittet 24 Driewwarke för dat Regeln van dei Ruumlaoge. So kann man dei aerodynaomischken Qualitäten van dei Kapsel vull utnützen un so dei Belastung för dei Astronauten minnern. Dei Bremsscherm mit 16 m² spring in 9 Kilometer Höchte up. In 7,5 Kilometer Höchte spring denn dei 518 m² groote Landefallscherm up. Mit dei Besatzung kann dei Kapsel noch 100 kg Fracht baobenschkup mit up dei Eern daolbringen.


En Sojus-Landemodul bi dei Arbeit. Bild: Nasa/Wikimedia Commons


Maol alle Knööp drücken? Bild Christopher Michel/Wikimedia Commons

Orbitalmodul (BO)

Dit Ümloopmodul (= Orbitalmodul) is rund 3 m lang un hätt einen Dörmäter van 2,26 m un 5 m³ Waohnvolumen. Dat Modul hätt ein Andock- un ein Anstüersystem. In dat Vöderdeil sittet veier Stüerdüsen. In den ünner Druck staohn Ruum van dat Ümloopmodul passet Frachtgaut un annere Nutzlast. Dor giff et uck eine Läbensversorgung un eine Toilette.


Also dei lerrige Ruumantoog is unheimlich! Bild: Tom7c7c7/Wikimedia Commons

In dei twei Daoge bit tau'n Andocken an dei ISS häbbet dei Astronauten hier ehre Waohnkaomer; Ruumanzüge bruuket dei hier nich antrecken.


Biller: ESA un Wikipedia
Rasswet: Rasswet-Infos hier
Blog van Alexander Gerst
Wor flügg jüst dei ISS?
Videos tau dei Mission
Logo-Bilddaoten: hier un hier
SO-Platt: Ludgerd Lüske
10.6.2018

 


na baven