Schandarm mit blage Spegel an'e Uniformjack

De Hester (Eichelhäher)

Kiek, door baben sitt he op 'n Boom un quarrt un räätscht as dull. He will, ik schall mit mien Hund weggahn. Hett he jo recht! Bit an'n Waldrand fliggt he achterran un passt op: Geiht se ok würklich weg? Jo, ik hau doch al av! Heff nu de Nees vull!

Wat? Höör ik dor wat? Kümmt een? Den warr ik dat wiesen! Da fallt mi dat in, wat maal een Schütter von de Dierten seggt hett: "Mi schient dat, de Jaagers scheet den Hester bloots doot, wieldat he so'n goden Schandarm is un de annern Dierten Bescheed seggt, dat dicke Luft is." Jo, he hett all mennigeen Jaager de Pirsch vermiest, denn he is'n bannig plietschen Oppasser, de dat heele Johr bi uns in Wald, Parks un Goorn leevt. Nix gifft't, wat he nich sehn deiht in sien Reveer. Un he bruukt veel Ruum för sik, wenn he sien Kinner groottreckt. Door geiht dat nich mit dree Bööm för tein Hesters. Ne, he bruukt'n grooten Placken Land för sik un sien Familje.
In Winter lett he sik geern in Goorn an't Vagelhuus sehn. Dat schönste sünd de blagen Spegelfeddern in sien Flünken. Mennigeen Hester hett doorför al starven mööten. Ok sien Koppfeddern, so'n richtige Fladusen, de he opstellt, wenn he gnarrig is, sehn woll smuck ut.
Eichelhäher - Garrulus glandarius - Hester
Familje Ravenvagels - Corvidae
Ünnerfamilje Sperlingsvagels
Heurt to de Singvagels - oscines

34 cm lang is he, woll duvengroot.

Jo, singen deiht he so wenig as 'n Krei, höört aver doch to de Singvagels.
He kann nömlich doorför allerhand räsoneern. Dat heurt sik denn an as dat "Miau" von'n Bussard, un he kann sogoor bellen as'n Hund un meckern as 'ne Zeeg oder knarrn as'n ollen Boom. Oftins deiht he rümtüdeln un saustern, dat een meent, dat is goor keen Hester, de door quaddert. Jo, aver wenn een Fiend in't Holt kümmt, dennso makt he luut sien "Räätsch! Räätsch!" - un alle Dierten weeten, welkeen door schreet, un maken sik blixoordig dünn.

 

He oder Se?

 

 

 

Hesterkind, noch wat lütt

De Hester-Mann süht nau so ut as sien Fru, bloots de Kinner sünd in eerste Tiet noch'n beten bleek.
So in Oostermaand söökt sik de Hester 'n Fru un de Hestersche 'n Mann, un dat Poor buut sik in Holt sien Nest ut Twiegen, merrn in en Boom.

5-7 Eier leggt de Hesterfru un brööt mit ehren Mann tosamen woll 16-18 Daag. Dree Weken vergahn, denn sünd de Lütten flügge.
In düsse Tiet haalt de Oolen sünners geern lütte Vagels un ok Eier ut de Nester ringsüm un verfodert se an ehr Jungen. Dat hett ehr Ansehn natüürlich bannig schaad't. Aver eten Se nich ok geern 'ne Karbonad oder'n Ei? Sünd Se dorüm een slechten Minschen?

Se oder He?
Jo, wat anners daat düsse Vagels ok nich! Un ehr Kinner schreen luut "Hunger". De wulln wat to'n Snabbeleern hebben. Doorbi mutt he jümmer in Deckung von sien Boom blieven, doormit sien Fiende em nich sehn un sien Nest plünnern.
junger Hester in't Avendlicht - süht he nich wunnerscheun ut? De Hesters sünd gode Öllern. Se fodert ehre Jungen ok noch, wenn se al flegen köönt. De Familje fliggt later noch lang tosamen in Holt rüm. Se freten aver ok geern de Knuppen von de jungen Bööm, de se sülven in Harvst plant hebben mit ehr Oort von "Vorratshaltung". Se steken de Eckeln sünners geern in Bodden von Nadelholt un sörgt so, dat de de lütten Hesters warrt fodert"Monokulturen" von de Dannen mit de Tiet to "Mischkulturen" mit Bööken, Eeken un Vagelbeeren warrn. De Biologe seggt, dat is ok een Grund, dat von Natuur jümmers gode "Mischwälder" in uns Land west sünd.

De Hester hett natüürlich ok noog Fiende. Door is de Katteker, de Krei, de Mart, de Havik un de Bussard, natüürlich ok de Raven. De freten ok geern lüttje Hester, aver se hebben den Hester nienich allemakt. Dat deiht bloots de Minsch mit sien Dunnerbüchs.

In Harvst, as dat Eckeln un Bökeneckeln gifft un de Kinner groot sünd, da warrn de Hester denn ok mehrst "Vegetaarier". Door freten se meist nich to kennen weer he, harr he nich sin blaage Fedder, nich?geern Samen un Nööt un Aaft un al so'n Tüüg.
Un de Nööt un Eckeln versteekt se ok för de Wintertiet in Bodden. Woll so an de 5000 Stück. Ob se een tellt hett? Mutt woll.

Aver ok Insekten un Wörms un sogoor Slangen freten se, sogoor Krüüzottern un allerhand Müüs dorto.
Hester op Posten in'n Forst. Wokeen warrt em dorwegen afscheten wullen?!
In Harvst finnen sik de Hesters geern in gröttere Pulks tosamen.
Dor maken denn de Minschen geern Jagd op de "slimmen" Hesters, un se seggen ok, de maken sooo veel Schaden. Is dat denn wohr? Ik gläuv, de Minsch richt noch veel mehr Schaden an. Poor Johr steiht de Hester in Düütschland meist ünner Natuurschutz, bloots in Bayern dröff he noch jaagt warrn. Door gifft dat noch rieklich veel von düsse Vagels.
Noch wat, wat heel wichtig is: Wenn Se mal bi't Spazeerengahn in't Holt de blage Fedder vun'n Hester op'n Weg finnt, denn is Se wat ganz Sünnerliches passeert. Verwohrt Se de Fedder goot! Uns Vorfahrn hefft al glöövt, dat düsse Fedder Töverkrafft hett. De Fedder kann Glück bringen, Wünschen erfülln, un to Noot is se ok'n Orakel — wenn Se an glöven. Un wenn Se dat nich glöven wullt — egaal, denn wokeen warrt so een scheune Fedder woll wegsmieten?!
de geheimnisvulle blage Fedder... nienich wegsmieten!
Dat de Fedder Se Glück bringt un dat de scheune bunte Hester noch lang bi uns blifft, dat wünscht Se un uns  

Se Ehr Sünnschienkieker.


na baven