Freddy, de Fischotter
— lat. lutra lutra —

Vör en poor Daag keken mi ut dat Blatt twee heel vergnöögte Ogen an. Uprecht stünn dor en putzigen Keerl, en Fischotter! De beiden Vörderpoten harr he vör den Buuk. Dat sehg ut, as wenn he seggen wull: "Kiek her, ik bün Freddy! Ik bün wedder dor!" De Otter weer as Fischröver bekannt. Sien dichtes Fell wöör geern to'n Pelz verarbeit. Dorüm hebbt de Minschen em överall nastellt. Wiel he Fisch freten hett, hebbt de Mönche em in de Fastentiet sogor as Braden trechtmaakt un eten. Se menen, he tell to de Fisch. Rezepte för den Braden kann man noch nalesen.

De Minschen hebbt em to dull jagt. He gell bi uns al lange Tiet as utstorven. Siet 1968 dörf he bi uns aver nich mehr jagt warrn. De Menen von de Minschen hett sik in de letzt Tiet aver vun Grund up ännert. Hüüt freut wi uns, dat de Fischotter överhaupt noch bi uns leevt. För uns is dat en Teken, dat de Natuur intakt is. Un nu is he wedder dor!

Dat Bild ut't Blatt hett mi neeschierig maakt. Ik kenn den Fischotter blots vun't Fernsehn un vun Biller. Nu wull ik em in de Natuur kennen lehren. En poor Daag later güng uns Fohrt to de Ottern in den Wildpark Eekholt. Dat weer Anfang Februar. Buten weer't noch bannig kolt. Ik weer aver nich to bremsen. Wi trocken uns dickes Wintertüüch an un mit den Knipskassen in de Tasch güng dat los. Un wi harrn Glück. De Fischottern weern quicklebennig. De Küll möök ehr nix ut. Se swömmen vergnöögt in dat ieskole Water rüm. As se uns gewohr wöörn, kemen se an Land un lepen an den Tuun hin un her. Se hebbt uns wull för den Diertenpleger hollen. Aver Foder geev dat eerst in en gode Stünn.

.

Nu kunn de Knipseree losgahn. Dat weer gor nich so eenfach. Överall weer de Drahttuun in'n Weg. Ik bünn den eenfach op en Holtplank klattert. Nu kunn ik vun baben dat lustige Drieven in't Water bekieken un knipsen. Twee Ottern jachtern vergnöögt ümeenanner rüm. Aver mi möök de Küll böös to schaffen. Mien Hannen weern bald ieskolt, ik kunn den Knipskassen nich mehr hollen. Wi hebbt denn eerstmal Meddagspaus maakt.

To rechten Tiet weern wi to dat Fodern wedder to Stell. De Diertenpleger harr Fisch un anner lütt Dierten mitbröcht. He güng in dat Gehege un de Fischottern hüngen an sien Büxenbeen. Bi't Fodern hett he uns denn wat över dat Leven vun de Fischottern vertellt.

De Fischottern in Eekholt sünd ut Kanada. Se sünd as Jungottern vun Dr.Hatlapa (Grünner vun den Wildpark Eekholt) 1994 na Düütschland haalt woorn. De lütten Ottern sünd mit de Buddel groottrocken worrn. Uns Ottern in Europa seht se aver bannig lik.

De Fischotter höört to de Sipp vun de Marder. He is bit to 1,4 m lang. De Steert hett alleen al 40 cm. An all sien veer Poten hett he Swömmhut mank de Töhn. Mit den kräftigen Steert un de Poten un den slanken Liev kann he gau in't Water vörankamen. Bi't Swömmen gifft dat richtig Kiellienen. Sien dichtes brunes Fell höllt em warm. Up een Quadratzentimeter hett he 50.000 Hoor! De Minsch hett blots ca. 120 per Quadratzentimeter.

Den Fischotter sien Kopp is flach un breet mit lütte Ogen un Ohrn. De Snuut is stump mit starke Borthoor (Tasthoor). De Fischotter is en heel vergnöögt un neeschierig Diert. He speelt geern. Freten deit he Fisch, Pögg, Müüs un allerlei lütt Dierten, de an't un in't Water leevt. En faste Ranztiet hett he nich — Fischotter maakt Leev, wannehr ehr dat in'n Kraam passt. Wat dorbi rutkümmt, sünd twee bit dree lütte Ottern. De kaamt blind to Welt. Eerst na ca. 30 Daag maakt se de Ogen up. De Lütten warrt alleen vun de Modder groot trocken. — To'n Wunnerwarken is düt: Von Huus ut sünd de lütten Fischottern waterschu! Wenn de Tiet dor is, warrt se vun Modder na't Water sleept un eenfach induukt. — En Fischotter kann bit to 15 Johr olt warrn.

Vull nieges Weten över de Ottern möken wi uns up den Nahuusweg. En poor Daag later stünn al wedder wat över den Fischotter in't Blatt. Ünner en utstoppten Fischotter weer en Stratenschild afbildt. Dat güng üm den Otternschutz. An't Enn vun den Artikel wöör en Vördrag künnig maakt.

Dat weer doch klor, dor müssen wi hin. De Vördrag weer goot besöcht, dor weern mehr Lüüd, as wi dacht harrn. Vörn up en Disch stünnen Verkehrsschiller un de utstoppte Fischotter. Un ik harr keen Knipskassen mit! Aver de Kreisjägermeister hett knipst un hett mi dat Bild tokamen laten. De Kreisjägerschaft will dörch Verkehrsschiller, de vör en Otternwessel upstellt warrt, den Schutz vun de Fischotter vergröttern.

De Vördrag wöör vun de Vörsittersche vun den Verein Wasser-Otter-Mensch hollen. Ehr Hauptanliggen weer, dat de Fischotter schützt warrn mööt. Nadem se uns den Fischotter vörstellt harr, kregen wi so allerhand över de Gefohren to weten, de em droht. De velen Autos up de Straten, de Fischreusen un dat Toschannenmaken vun sien Levensruum sünd de gröttsten Gefohren för em. Över de Beken un Strooms warrt ümmer mehr Brüchen buut. Dor geiht de Otter nich ünnerdörch. Vör de Brüch stiggt he ut't Water un löppt denn över de vun Autos befohrene Straat. Wenn he heel röver kamen is, stiggt he up de anner Siet wedder in't Water. Düsse Eegenoort hangt wohrschienlich mit den Larm un dat Dröhnen vun de Autos tohoop. Ünner Water is de Larm vun de Autos noch veel luder. Nu süllt de niegen Brüchen över de Strooms ünnen an't Över mit enen Otternstieg versehn warrn. De Otter bruukt denn nich mehr över de Straat.

In Kesdörp (Ostholsteen) kann man sik dat al ankieken. Losung un Afdrück vun sien Poten wiest uns, dat he den Otternstieg annahmen hett. As Otterntunnel warrt Rohre vun tominnst 80 cm Dörchmeter ünner de Straat vergraven. Hinstüürt warrt de Ottern to den Tunnel dörch en Leittuun (as bi en Krötentunnel). De Fischreusen kriegt an den Inslupp en extra Gitter. Dat Gitter is so eng, dat de Ottern nich mehr in de Reus köönt. Dörch Renatuurreern versöcht man den Levensruum wedder hertorichten. Dat Gras an't Över sall blots eenmal in't Johr meiht un Buschwark sall anplant warrn.

Ümmer wedder findt man besünners up de Straten dode Ottern. De warrt na en Institut in Berlin schickt un genau ünnersöcht. Dörch de DNA kann man de Dodesursaak faststellen un ok woneem de Otter herkümmt. Inwannern na Holsteen deit he ut Mekelnborg un Däänmark. Jedeen Johr schafft he bit to 10 km. Wüllt höpen, dat sik de däänschen un de mekelnborger Ottern, wenn se sik draapt, goot verstaht!

För uns weer dat en Freud mittokriegen, wa de Minschen sik höögt, dat de Otter wedder bi uns is. Sehn lött he sik leider recht selten. He is in de Hauptsaak in Düstern ünnerwegens. Aver de Afdrück vun sien Poten sünd besünners in'n Winter nich to översehn. Se wiest uns, dat he wedder dor is. He is ok to possierlich. He löppt nich blots över dat Ies, ne, he rutscht ok up sien Buuk. De Sporen vun de Rutscherie sünd in'n Snee düütlich uttomaken. In Schwerin hett en Autofirma op de niegen Autos ümmer Kratzsporen funnen. Dat hett lang duurt, bit se mitkregen, dat de Fischottern de Köhlerhauv as Rutschbahn bruken.

All düsse Begevnisse heff ik dörch den Fischotter Freddy ut dat Blatt to weten kregen. Nu wüllt wi höpen, dat de Fischotter hier bi uns vele lütte Ottern to Welt bringt un sik in Ostholsteen wedder richtig heimisch föhlt.

Anfang Juli 2007

Dat is kuum to glöven, aver de Fischottern in Eekholt hebbt mienen Wunsch erfüllt. In't Fernsehen wöör'n Anfang Juli dree junge Fischottern vörstellt. Ik keek mien Mann an: "De mööt wi uns ankieken!" He nickköpp. En Week later weern wi in Eekholt. Schnuurstracks güng dat na dat Otterngehege. Un dor jachtern de lütten drolligen Ottern ümmer achter ehr Modder ran. Mitünner keem Vadder achterna!

Dat güng so gau, dat ik se kuum knipsen kunn. Mal weern se in't Water un denn güng wedder de wilde Jagd dörch dat Gehege. Ümmer achternanner her. Se weern al recht groot. Aver vörher hebbt se sik buten noch nich seh'n laten. De jungen Ottern sünd waterschuu. Modder mööt ehr dat Swimmen bibringen. Aver wenn se dat lehrt hebbt, sünd se mehr in't Water as an Land.

De Pleger hett uns vertellt, dat se goot twee Maande olt sünd. Biet Fodern vun de Ottern kregen de jungen Ottern ok enen lütten Fisch ut sien Hand. Dat weer recht drollig antokieken wenn se to'n Freten den Fisch in ehr lütten Vörpoten fasthöllen.
Wi kunnen uns gor nich vun de Otternfamilie trennen. Wüllt höpen, dat ok in de free Natuur lütte Ottern to Welt kamen sünd.