Farvfotograofie, ein Spill mit Lecht un Farve

vun Ludgerd Lüske

Wo geiht dat äöverhaupt mit einen normaolen Farvfilm?

Dat Wiesen van Farven up'n Bildscherm (tau'n Bispill: Fernsehapparaote, Monitore) un up druckte Farvbiller un Farvfotos geiht mit dei drei Farven: Rot, Greun un Blaw. Dormit käönt alle annern Farven anmischket wern (süh bi geel). Ein Schemao schall us dat verklorn:

Afbild 1: Belechten und Entwickeln van ein Farvfilmnegativ. — Se köönt dat Bild dör Klick vergröttern! Trügge kaomt Sei wer mit den "Zurück"-Knoop up dei Symbollieste

Farvfilme hebbt meist drei fotoaktive Laogen up einen dörsichtigen Unnergrund. Disse Laogen sünd so inricht, dat dei blots up dei utsöchten Farv-Andeile (Rot, Greun, Blaw) van dat Lecht reageern käönt.

Dat blawe Lecht maokt dorbi Probleme: Alle Filmlaogen reageert dormit. Dorümme werd unner dei böverste Laoge för Blaw eine geele Filterschicht tüschkenleggt. Dei lett dit Blawlecht nich dör. So werd dei annern Laogen dorgägen afschermt. Up dei Stäen, wor dei Lechtstraohlen dei fotoaktiven Laogen draopet, werd disse aktiveert. An disse aktiven Stäen werd bi't Entwickeln dei Negativfarven (geel (Y, yellow), purpur (M, magenta), blaw-greun (C, cyan)) anleggt.

Man Negative bekieken helpt us nich wieder, sünners bi Farvnegative geiht bi us in' Brägen alls dörnanner, wi seiht kien örnlicket Bild! So, nu mutt dat Negativ wer herhollen. Wittet Kopierlicht lett man in einen Vergrötterungapparaot dör dat Negativ schienen. Up dat unnerliggen Foto-"Papier" (is vanoage nich mehr ut Papier, sünnern ut Kunststoff) kaomt blots dei Lechtfarven an, dei van dat Negativ dörlaoten werd.

Dat Fotopapier hett so as dei Negativfilm 3 fotoaktive Laogen (süh Afbild 2), mit eine geele Filterschicht unner dei eierste Laoge. Disse Laogen verhollt sik jüs so as bi den Negativfilm un kriegt bi't Entwickeln uk dei süftigen Farven anleggt (Y, M, C). Dei Unnerlaoge is witt un schmitt dat upschienen Lecht wer trügge.

Afbild 2: Kopeeren van dat Negativ tau ein Positivbild. — Se köönt dat Bild dör Klick vergröttern! Trügge kaomt Sei wer mit den "Zurück"-Knoop up dei Symbollieste

Wo kump dat nu tau ein Positivbild, dat dat knipste Objekt in dei Originaolfarven wiest? Dei besünnere Dreih ligg in dat subtraktive Mischken van dei Lechtfarven (süh Afbild 3).

Afbild 3: Subtraktives Mischken. — Se köönt dat Bild dör Klick vergröttern! Trügge kaomt Sei wer mit den "Zurück"-Knoop up dei Symbollieste

• Dor, wor dat Negativ Geellecht dörlaoten hett, ligget in dat Positivbild dei Farven Magenta (M) un Cyan (C) äövereinanner. Bi disse Mischung seiht wi Blaw. Dat passt uk tau dat vörher knipste Objekt, dat dorvan afstraohlte Blawlecht hett för dei geele Farve in dat Negativ sorgt.

Up disse Oart geiht dat uk mit dei annern Farven:

• Dor, wor dat Negativ Magentalecht dörlaoten hett, ligget in dat Positivbild dei Farven Geel (Y) un Cyan (C) äövereinanner un wi seiht bi disse Mischung Greun, pass tau dat Objekt.
• An dei Stäe, wor dat Negativ Cyanlecht dörlaoten hett, ligget in dat Positivbild dei Farven Geel (Y) un Magenta (M) äövereinanner un wi seiht Rot, stimmig tau dat Objekt.
• Geel seiht wi in dat Positivbild, wor dat Negativ dei Lechtmischung ut Magenta (M) un Cyan (C), dat is Blaw, dörlaoten hett. Disse Farvkombinatschioon in dat Negativ kööm jao van den Geellichtandeil van dat knipsde Objekt.

Sei stiegt dor so langsaom nich mehr dör? Dat maokt nix, tauleßt giff et noch ein Bild mit eine Äöversicht:

Afbild 4: Van't Objekt äöver't Negativ tau'n Positivbild. — Se köönt dat Bild dör Klick vergröttern! Trügge kaomt Sei wer mit den "Zurück"-Knoop up dei Symbollieste

In den taukaomen Bidrag van düsse Riege unnerseuket wi dei Infrarotfotograofie.