
Vadder Swaan is de Baas un
geiht över Lieken
|
Mörderische Swaans
vun Antje Heßler
Se köönt de Fotos per
Klick vergröttern. Trüch kaamt Se denn mit den Zurück-Knoop
op de Browser-Symboolliest.
An't Över vun de Traav visavis vun dat Lokal "Traveblick"
in Tramünn harr sik dat inbörgert, dat de Spazeergänger
de Watervagels mit Foder versorgt. Wenn se en Tüüt in de
Hand harrn, weern de Swaans, Aanten un Möven
furts to Stell. Ok de Kreien wull'n wat afhebben. Dat weer ümmer
en groot Gekriesch un Geschrie un Gezank.
Düt Johr harr sik nu en Swaanenpoor utrekent düssen Placken
för en Nest utsööcht. Twee Küken hebbt se utbröödt.
För de Lüüd ümrüm weer dat en Vergnögen,
de Swaanenfamile to beluren. Groot Bewunnern funn dat Uppassen vun
de Swaanenöllern up ehr beiden Kinner. Vadder Swaan leet keen
annern Swaan in de Neegde. Mit Zischen un utbreedte Flünken wöörn
de verdreven. Vun dat Lokal "Traveblick" kunnst dat wunnerbor
beluren.

Dat Nest an't Över

Un he höllt dor Wacht

Nu kiek eens, wat is dat denn dor?
De
twee lütten Swaans weern intwischen düchtig ranwussen. Tohoop
mit ehr Öllern lungern se düchtig na Foder, kemen över
den grönen Rasen bit an de Straat. Eenes Daags weer groot Oprohr.
An't Över, direktemang an den Rand vun de Steen, leeg en drüttes
Swaanenküken. Kunnst em kuum sehn, so harr he sik in en Kuhl
twischen Steen un Rasen dükert.
Vadder Swaan weer dat frömde Küken likers glieks wies woorn.
Opreegt mit upplustert Flünken güng he up den Frömden
los. De stell sik dood un röhr sik nich vun Placken. Nu haal
Vadder Swaan noch sien Familie to Hölp. Aver de Frömdling
bleev in de Kuhl liggen.

Dat mutt weg!

Verwaist? Jung? Swack? Hülplos? Vunwegen!
För Vadder Swaan: de Fiend!

Mal in'n Hals bieten!

Dat leevt ja jümmer noch!!!

Nafaten...
...un kräftig wörgen!

Endlich doot?
Feddern sünd flagen
|
Intwischen harrn de Lüüd vun de Straat un ok de in dat
Lokal den Vörfall mitkregen. Se stünnen an't Finster un
diskereren. Man müss doch wat doon! Man müss doch dat frömde
Swaanenküken to Hölp kamen.
Nu güng Vadder Swaan to'n Angriff över, dat de Feddern
flögen. De Frömde harr sik ümmer noch nich vun de Stell
röhrt. Vadder Swaan kneep den Lütten in den Hals. De düker
sik noch mehr tosamen. Ümmer wedder kneep he em in den Hals.
So lang, bit de Lütt utkneep un endlich na baven an de Straat
leep. Dor sack he in sik tosamen. Nu leeg he swack un hölplos
door.

Alleen op de Welt
Noch eenmal nehm he all sien Knööv tohoop un leep rünner
un güng glieks in't Water. Vadder Swaan keem mit upplustert Flünken
furts achterna. In't Water hett de Lütt dat denn aver schafft,
dor kunn he utkniepen. Vadder Swaan harr blots noch dat Nasehn un
keem wedder torüüch.

He hett dat in't Water schafft...

...un mutt ok vun dor verdreven warrn!

Dat Jungdeert flücht ünner de Brügg

Allens klareert?

Allens klareert!
"Is allens okay!", reep he sien Familie to un slöög
mit de Flünken.

De Minsch is den Minschen en Wulf, seggt Plautus.
De Swaan den Swaan ok.
23.10.2013
|