Dat Buddelbiotop

vun Thomas Seemann

Annerletzt heff ik mi en Buddelbiotop orr Flaschenbiotop anleggt un tööv nu, dat sik dat inpennelt. De Planten sünd: Orchidee, Sukkulenten un Farn. Wat warrt sik opletzt dörsetten?

Dat Flaschenbiotop warrt ok Flaschengoorn nöömt. Dat is en Buddel mit levig Grööntüüchs binn, in de de binnere Fuchtigkeit, also dat Water, in en slaten System jümmers wedder ümlöppt. Bi'n Gewächshuus is dat ganz liek. Dat Beste is na mien Menen en Weckglas, so'n klassisches, as dat hüüt nich mehr herstellt warrt. Man dat gifft en italieenschen Hersteller, de dat lieke Glas buut mit den lieken Versluss — dat slütt liekso good as de Klassiker.

In't Internet finnst ok meist al to veel to düt Tüüchs, dat geiht dor bannig in de Details. Man düt Biotop heff ik nich na en Vörlaag buut, sünnern so, as ik mi dat vörstelln do. Bestimmte Saken muttst beachten, anner sünd egaal.

Heel nerrn heff ik Kies, Sand, denn wedder en Schicht Blomeneerd (Bio, sünner Torf) infüllt. Dor kaamt ok poor Holtresten rin, Stücken vun afstorven Pinienholt, lütte Schieferstücken un ok Steen.

Denn kaamt de Planten rin. Vun de Orchidee höp ik mi schönes Blöhn, dat maakt mehr her, as wenn dat bloots eenfarvig gröön weer. De Sukkulenten sünd ok Blöhplanten, avers wisslich duert dat noch länger, bet se noog wussen sünd, dat se blöht. Opletzt füllst Water in. Wo veel? Dat muttst utloten, je na Grött un Planten. Fröh an'n Morrn schullst nakieken. Wenn dat Glas denn beslaan is, so as in mien Fotos, denn hest to veel Water binn un schullst welk dorvun bi apen Deckel afdampen laten. Sünd de Schieven op de anner Siet kloor, denn kannst noch beten Water nakippen.

Wenn to veel Water binn is, kannst ok noch en Plant nasetten, villicht noch en lütten Bodendecker. Man in so'n lütte Anlaag is dat meist al to veel.

De Planten in en Buddelbiotop blievt lütt. Dat Bonsai-Prinzip — bi Fisch gifft dat dat ok, t.. in en Aquarium orr en Goorndiek. Leevwesen passt sik even an ehr Ümgeven an. Anners köönt se nämlich nich överleven, un dat entscheidt allens.