Finchen. Twee Protokolln
|
All de Biller hier
köönt Se anklicken, dat Se de 'n beten grötter seht.
Trüch kaamt Se denn mit'n Trüch-Knoop in SeEhr Browser-Symbolliest.
|
Anfang
April: Nestbuu |
|
De Amsel:
Nu geiht dat wedder los.
Woneem daat wi dat Nest düt Johr hen,
dat dat noog Schuul vör de Heisters hett? Wedder in'n Blomenkassen
dar in'n tweten Stock. Den kennt wi ja all. Hett Sünn, de Balkon,
un de Lü stöört nich so.
|
|
De Minsch:
Na, is se all wedder dar? Wat dat woll desülvige is as de letzten
Johrn? Uns Finchen?
Finchen heet eenfach Finchen. "Josephine" orrer so hett se
nienich heten. Dat mach avers ween, dat se een hoochdütsch Amsel
is. |
Jümmers her mit den Kraam to'n Nestbuun. Wat is dat denn dor? Hm,
jo, lett sik inbuun. Dat daat wi ganz na nerrn. |
Gau Platz maken in'n Blomenkassen.
|
Amselnest op Plastikfolie
|
De
Minsch:
O nee, nu hebbt se sik Plastikplaan utfunnen! Dat daat se in't Fundament.
Avers wenn een jüm wat to'n Buun henleggt, jüm wat Godes to
daan, dennso wüllt se't ja nich hebben. Dor sünd se denn krüsch.
- Na, gau geiht dat ja. 'n poor Stünn över Middag, un dat
Nest is trecht. |
De neegsten Daag: Eier legen |
|
De Amsel:
Nestbuu geiht ja noch, avers denn is de Kierl to nix mehr to bruken. |
|
De Minsch:
Elk Dag een Ei, dar sitt se nu. Veer sünd dat all. Blifft dat dorbi?
Jo. Düt Johr bloots veer. |
De Amselhahn (singt):
Düt is min Revier, min Revier!
Hier sitt min Fru op de Eier!
Düt Johr sünd dat nich fief, nich fief, man veer!
Truut ji juuch nienich in min Revier!
Düt is min Revier!
Ji, de ji mi nich glöövt, ik will juuch dat glieks wiesen!
Stried ji mit mi, denn wies ik juuch dat!
Seht ji juuch vör, düt is min Revier!
|
De
Minsch:
Un dat gröölt he nu fröh un laat. Avers he is ok'n düchtigen
lütten Kierl un kennt nix, wenn sik anner Amselhahnen sehn laat!
Denn fleegt de Feddern. |
De
Amsel:
Hach, he is ja man doch 'n staatschen Kierl, un singen kann he...! Dar
krieg ik jümmer wedder weke Knee bi. |
|
Tweete Week: Bröden |
|
|
|
De Amsel:
Langwielig.
Wannehr krieg ik wat to freten?! Mutt mi wat holen gahn.
|
De
Minsch:
Düt Johr hett se keen Dag Urlaub nahmen. Süß deit se
dat jo. Hett foorts anfungen to bröden. |
Nanu,
dor is ja ok min dösigen Mann! Finnt wedder dat Nest nich. Dor
sitt he wedder op'n verkehrten Balkon un kiekt kareert. |
Keen
Wunner, dat he den Weg na't Nest vergitt. Se flüggt ja jümmers
Ümwegen, dat de Räuber dat nich spitzkreegt. Un he kiekt ehr
na un kümmt in'n Tüdel. |
Mutt
mal wedder de Eier ümdreihn. So, un nu wiederbröden. |
|
|
De Minsch:
De olen Blomen in'n Kassen sünd totaal welk. De frischen heff ik
all praat, avers dat Deert flüggt partu nich weg. Woso maakt se
nich mal een Paus vun't Bröden?
Af se mi woll niege Blomen planten lett, wenn se dor sitt? |
De
Amsel:
Dar heff ik ehr nu goodmödig ehr Grööntüüchs
in min Blomenkassen planten laten, un to'n Dank hett se mi nu so'n alberne
Windmöhl an'n Steel mang de Blomen sett! De niegen Blomen sünd
ja schöön, avers dat Ding dä nich nödig. |
|
De Minsch:
De Windmöhl warrt sachs de Heisters afschrecken.
|
Drütte Week: Bröden |
|
|
De
Amsel:
Langwielig! |
|
De Minsch:
Nu warrt dat spannend.
|
De Amsel:
Langwielig!.........Ik heff Hunger. |
De Minsch:
Wannehr kaamt se woll rut? An't Enn vun'e Week mutt dat so wiet ween... |
|
...Eier ümdreihn... |
De Amsel:
Langwielig! |
Enn vun'e drütte Week:
Sluppen |
|
|
De Amsel:
Sünd ji so wiet? sünd ji all so wiet? weest man nich bang,
kaamt rut, kaamt rut!
De eersten sünd rut!
Heff keen Tied mehr för lange Kommentaarn.
Heff to daan.
|
De Minsch:
Se lockt de Lütten ut de Eier. De kennt ehr Stimm all.
De eersten sünd rut!
Nee, wat seht de wedder ut! Nakelt un swack
un köönt ehrn Kopp nich baben hollen. De Köpp steckt
se all tohoop in de Midd vun't Nest. Sehn köönt se ok noch
nix.
|
De Köpp sackt jüm na
vörn, de sünd to swaar för de lüttjen Deerten...
|
Veerte Week: Fodern |
|
De Amsel:
Ja, ja, ik kaam ja all! Woneem is de Kierl? Hett wedder den Balkon verwesselt?
Ja, ja, ja! Nu quiekt man nich so. Nee, mehr gifft dat för nu nich.
Orrer glöövt ji, dat Foder flöög mi in'n Snavel?
Mutt jagt warrn! Ja,
ja, ja! Ik meen, nee! Ach wat, ji maakt mi ganz tüderig. Nee, nu
nich! Mutt sülben ok mal wat freten. Na good, denn kriggt ji dat
ok. Woneem blifft bloots juun Vadder? Ja, ja, ja! - Laat mi an Land! |
De Minsch:
De arme Kierl! Nu will he ok flietig mitfodern un finnt sik nich trecht
op de Balkons. Mutt dat nu eerst lehren. Keen Wunner, he weer ja tovör
nich so faken in't Nest, un Finchen flüggt ja jümmers op de
dullsten Ümwegen, dat de Heisters nich klaarkreegt, woneem dat
Nest is. Dor! nu hett he dat funnen. Nu gifft ok wat vun Vaddern to
freten. |
|
De
Minsch:
Wat wi woll düt Johr wedder mit de Heisterwacht anfangen mööt?
So as verleden Johr... Vörverleden Johr harr de Heister ja elk
Dag een vun de Jungen to'n Fröhstück verputzt - as se fett
noog weern. Un dat neegste Johr hebbt wi denn Heisterwacht hollen -
fröh op un rut op'n Balkon un nienich weggahn, wenn Finchen Foder
holen weer... |
|
|
|
De
Minsch:
O nee, de Heisters sünd all op'n Rasen! Un de Jungdeerten warrn
langsam fett un kriggt ehr swatt Fedderkleed... |
De
Minsch:
Se passt avers op as'n Luchs, uns Finchen. Un wenn Vadder Foder holt,
dennso hudert Finchen glieks de Brood - warmt ehr vun baben. |
|
De Amsel:
...jawoll, een ganz elennige Bangbüx büst du, dat will ik
Di mal seggen! Wenn du ok teinmal de Vadder vun min Brood büst.
Ganz alleen harr ik den groten Heister angriepen müßt! Wokeen
hett sik ünnern Busch verkrupen? De Herr Vadder! Mit anner Amselhahnen
kannst kämpen, avers mit'n Heister? O nee, mit di is partu nix
los! |
|
|
|
De Amsel:
Dat Gröffste hebbt wi nu dörstahn. |
Föffte Week |
De Minsch:
Nu hebbt wi jüm binah groot. Na veertein Daag fangt se an to flarren,
denn flüggt Mudder in'n Boom un lockt jüm vun dor, un Vadder
sitt op'n Nestrand un vermünnert jüm, steckt jüm ok af
un to 'n leckern Happen to. Un wenn se sik denn truut, denn fladdert
se af un kaamt nich mehr trüch. Nerrn op'n Rasen kann een jüm
denn noch sehn, mang de Büsch. De Heister fangt dor sachs noch
dat een orrer anner weg. Heister mutt ok leven... Denn duurt dat nochmaal
'n poor Daag, denn köönt se richtig flegen. Un villicht -
villicht brööd de Ollen denn ja nochmaal... |
Vexeerbild: Woneem is de Amsel?
|
Gertrud Everding - de Sünnschienkieker - un
Marlou Lessing
|
|