En Exoot! — De Boom-Hasel

vun Antje Heßler

Al lang harr ik em in't Oog, mienen Exoten. He is rank un slank un na baben spitz tolopend wussen. Gegen den hellen Morgenheven heef he sik wunnerbor af. Besünners nu in de Wintertiet sehg he meist enen Scherensnitt liek. In Sommer harr he sien smuck gröön Kleed an. Dat stünn em ok recht goot. Vun Johr to Johr weer he in de Twischentiet ranwussen.

Mien Exoot weer en Boom in Navers Goorn. Ümmer wedder full mien Oog up em. Dütt Johr harr he nu in de Wintertiet noch wat ganz Besünneres. An sien Telgen hüngen düster utsehend stickelig Kugeln. De sehgen richtig gefährlich ut. Hebbt bald dat Utseh'n von en Morgenstern. (Dat weer en gefährlich Waff, wo sik de Minschen in't Mittelöller mit slaan un ümbröcht hebbt.)

Weer he villicht krank, weern dat womöglich Schmarotzer, lütte Töllerliker? Al lang wull ik mi düsse Kugeln wat genauer bekieken. Aver denn weer slecht Weder un de Wiehnachtstiet keem dormang.

Güstern heff ik dat nu endlich schafft. Un dat weer en groot Överraschen för mi. Nu wüss ik ok, worüm de Eekkater ümmer in den Boom rümjachter. He hett nich blots sien Klatterkünst öövt. Ne, he hett dor wat to Freten funnen! Ünner den Boom legen en Barg leere Nuttschalen. Dorneven ok noch so stickelig Kugeln. In de seten noch deelwies de Haselnööt. Eenige vun düsse Kugeln hüngen noch in den Boom. Dat weer also en Haselnuttboom! Bit dorto kenn ik blots Haselnuttbüsch. Mien smucken Boom weer denn ja wull doch en Exot!

Dörch "Google" heff ik denn rutkregen, dat de dore Boom en "Boom-Hasel" is. He kümmt ut Südeuropa un is besünners oft in de Türkei antodrapen. Dorüm drüggt he ok den Naam "Türkischer Hasel". De Boom hört to de Oort vun de Haselnuttbööm (Corylus). He tellt to de Barkenbööm, mit latinschen Naam Betulaceae. In de dore Gegend warrt he geern as Stratenboom anplant. Sien slanken hogen Wuchs bruukt nich veel Platz. He kann bit to twintig Meter hoch warrn. De Nööt sitt mit söss un mehr altohoop in en stickelig kugelig Fruchthüls mit Bläder, de deep inritzt sünd. Man kann se eten, aver uns Nööt vun den Gemeinen Hasel sünd grötter un smeckt ok beter. Ut de Nööt vun den Boom-Hasel warrt Nuttkoken backt. Sien Holt warrt geern för Möbel bruukt un is ok bi de Holtsneder beleevt.

Sietdem ik dat allens över den smucken slanken Boom, mienen Exoten, weet, kiek ik nochmaal so geern ut mien Finster in Navers Goorn un heff mien Freud an em.