Ole Boom, junges Gröön

Vun ole Eekbööm

vun Antje Heßler

En olen Eekboom is al lang in mienen PC spiekert un töövt dorup, dat ik wat över em schriev. Aver ümmer wedder kümmt wat anners an de Reeg. As ik vör en poor Daag den Ordner "De ole Eekboom" uprööp, keek mi glieks de Boomgeist vun de Eek an un grien: "Na, bün ik di wedder mal infullen? Ik leev ümmer noch un seker war ik noch länger leven as du! Du weetst doch, dat ik al över sösshunnert Johr up den Puckel heff." Ik nickköpp un harr meist n'beten slecht Geweten.

Höhl in den olen Eekboom

Al vör dree Johr weer ik den olen Eekboom in Flehm bi Högstdörp, Kreis Plön wies worrn. Ik heff em in Winter un ok in Sommer besöcht. Ik wüss, wi oolt he weer, un wüss ok, dat he enen Stammümfang vun 7,77 m harr. He tell to de öllsten Eekbööm in Sleswig-Holsteen. De Stamm harr noch Saft, un he dreev in't Fröhjohr ümmer wedder frisches Gröön. Eenige Telgen weern verdröögt un afbraken. Grote Löcker weern nableven. Dor harr de Boomgeist sik en Wahnung söcht. Un nu keek he mi mit enen Grienscher an. "Fohr du man mal na Meckelnborg, dor gifft dat ok ole Eekbööm!", meen he to mi.

Een Johr dorna möök ik mi mit mien Mann up den Weg na Meckelnborg. Dor kemen wi an enen Wegwieser vörbi! He wies uns den Weg na de ole Eek in Feldhusen. Al vun wieden kunnen wi se utmaken. De Boom weer aver noch krall un sien Stamm weer glatt un schier. Blots enen groten verdrögten Telgen streck he ut. De sehg meist ut as en Arm, de uns de Hand geven wull. Wat goot, dat wi en Metermaat bi uns harrn! Sienen Stammümfang tell stolte acht Meter un tein Zentimeter. He weer noch dicker as de Eek in Flehm!

De Anwahners hebbt uns vertellt, dat düsse Eek al 800 Johr up den Puckel harr. So ganz genau wüssen se dat nich. Na sien Utsehn hett he wull dat glieke Öller as de Eekboom in Flehm.

Wat de beiden Veteranen wull allens to sehn kregen hebbt? Beide Bööm stünnen an en ollen Landweg. Seker harrn se dor veel mitkregen. Up se sik noch up de Minschen ut düsse Tiet besinnen köönt?

De Eek vun Feldhusen liggt in en Neederung. Dörch de güng de Harkebäk över den Deipsee in de Oostsee. Wenn de Feldhusener Eek sik reck, kann se dat Water vun den Deipsee achter de Bööm blenkern sehn.

An den See sünd noch hüüt de Resten vun en oldwendischen Burgwall to sehn. Dor sall en Burg stahn hebben. En Anwahner finnt up sien Spazeergäng na den Borgwall noch öfter ole Muurresten vun de Borg, so hett he uns vertellt.

De Deipsee

Dörch de Verbinnung vun de Harkebäk mit den Deipsee weer de Borg en godes Versteek. Man vertellt sik, dat to Störtebekers Tieden de Seerövers sik mit ehr Scheep dor en Toflucht söcht hebbt, üm ehr Deevsgoot to versteken. Twee Dagelöhner ut Feldhusen wüllt sogoor enen Schatz vun Störtebeker in den Borgwall funnen hebben.

De Tafel mit de Saag. Klick up to'n Vergröttern!

So süht de Tafel ut

Hüüt is de Verbinnung to den Deipsee mit Scheep vun de Oostsee nich mehr möglich. De Harkebäk is towussen un de Deipsee is en Anglerparadies. Aver de Verbinnung vun de Harkebäk mit de Oostsee hebbt se wedder frie maakt.

Up de ole Eekboom vun Feldhusen noch Störtebeker sehn hett? Jedenfalls föhlt he sik an düssen Placken wohl. In't Fröhjohr drifft he niege zartgröön Bläder. In Sommer graast Peer up de Wiesch neven em.

In'n Harvst smitt he de riepen Früchte af un de Eekeln liegt to sien Fööt. Un wenn dat denn richtig kolt ward, smitt he ok de Bläder af. Sneestorm un Küll köönt em nich veel anhebben. Mit Sekerheit överleevt he uns.

Wi hebbt em över twee Johr besöcht un bekeken. Hefft in'n Klützer Winkel noch veel Eekbööm sehn. Hebbt ok up de Buurnhööf Goorndische ut ümweihte ole Eekenbööm sehn. An de Kant vun de Dische kunn man de Johresringe vun de Bööm aftellen. Dat Leven harr depe Sporen trüchlaten.

De Eekbööm sünd för uns wat ganz Besünners. De Boomgeist weer mitkamen un nickköpp. He freu sik över uns.