Zwergesel Caspar

vun Antje Heßler

Ik bün an'n 21.03.09 in den Eselpark vun Nessendörp up de Welt kamen. Dat weer en groot Beleevnis. De Baas vun den Eselpark hett sik bannig över mi freut. "Dat is aver en smucken Esel. He hett en sneewitt Fell!", reep he luut vör Freud. Dor heff ik eerstmaal an mi hindaal keken. Un mien Fell weer wohrhaftig sneewitt. Se hebbt mi up den Naam Caspar dööpt.

Bald keem ik mit mien Modder in en annern Stall, de harr en Döör na buten. Dor heff ik mi eerstmaal allens ankeken un bün vör luder Freud ümmer rundüm lopen. Denn bün ik eerst de annern Zwergeselkinner in den Naverstall wies woorn. De harrn wohrhaftig all en gries Fell un weern ok n'beten öller. Aver se hebbt likers dörch dat Gitter mit mi snackt.

Nu kreeg ik langsam Döss un leep na mien leev Mama.

Blots wiel ik en witt Fell harr, kemen de Besöökers mit ehr Kinner toeerst na uns. Ümmer wedder höör ik: "Guck mal, der niedliche kleine weiße Esel!" Dat witte Fell mütt wull wat ganz Besünneres ween, denn mien Mama hett en düstergries Fell. Dat sehg smuck ut, wenn wi twee neveneenanner stünnen. Mien Mama mit ehr grieses un ik mit en sneewitt Fell. Wat mien Papa wull vör en Fell hett? Wiss is sien Fell witt un ik heff de Farv vun sien Fell arvt.

Aver en Albino bün ik nich, ok wenn eenige Lüüt mitünner meent, ik bün en Albino. Nee, ik heff dat witte Fell wohrhaftig arvt.

Albinismus nöömt de Wetenschaplers dat, wenn en Deert — dat Deert kann ok en Minsch ween! — ganz witt boren warrt, ofschoonst sien Öllern dat Witte gor nich in ehr Arvgood hebbt. Eentlich is dat Witt nich witte Farv, sünnern gor keen Farv. Tostann kümmt dat, wenn dör Tofall bi en Deert en Gen nich richtig warken deit, dat den Farvstoff Melanin tostann bringt. Dat Pigment Melanin gifft nämlich de Farv in Huut, Hoor, Oogen un Feddern (bi Vagels). Albinos hebbt helle Huut, helles Fell, helle Wimpern, ok hellere Oogen as de annern Deerten vun ehr Familie. Albinos sünd Albinos vun Anfang an, ehr Leven lang. En Krankheit is dat nich, man ännern kannst dat ok nich.

Mien witt Fell is aver arvt un dat warrt veel bewunnert. Ik freu mi, dat ik en witt Fell heff.