Dei Büschelros bläuht

vun Behrend Böckmann


Se köönt de Fotos per Klick vergröttern.
Trüch kaamt Se denn mit den Zurück-Knoop op de Browser-Symboolliest.

As dei Büschelros ut denn Fiernen Osten bi uns inschleppt wür, dunn kreech uns rosa Wäpelduurn orrer Hunnros' (Rosa canina) 'n witt Schwesting (Rosa multiflora) un sei bläuht äbenso as dei Wäpelduurn blot einmål un dei lüttten witten Bläuden sitten in Büschel an'n Stäl un lüchten so, as wenn dat ok Bläuden vonne Brommelbeern sien künnen. Ierst wenn dei Harst kümmt, fangt dei Busch wedder tau lüchten an, denn nu farwen sik dei lütten Hambutten orrer Lusbeern rod, sünd nu wat för uns Ogen un daun bi männig Vågel gaut lickmünnen.

Sünd denn dei Kaarns ut'n Hambutt dörch 'n Vågelmågen wannert un fallen dörch Taufall ünnern Appelbom up 'n gaude Ierd, denn vermihrt sik dei Büschelros' äbenso as dei Hollerbusch in'n Rämel. Un so heff ik nu in mien gräune Eck in'n Gorn 'n prächtigen Büschelrosenstruk as Blickfang näben 'n annern "invasiven Neophyten", dei gäl lüchtenden Topinamburbläuden. Dor, wo dei Büschelros steiht un dei Topinambur wasst, dor hemm' dei grote Nettel un dat Wustkrut nich väl Glück, sik ok noch uttaubreiden.

Dei Büschelros

Sei is ut Asien tau uns kåmen
un kreech Büschelros' as Nåmen,
ehr Bläuden lüchten ut'e Fiern
as wiern sei vonne Brommelbeern —
so schneiwitt un dicht an dicht
bet dei Schnei denn ünnen licht.
Un wennihr kümmt dei Harst denn ran
fangt dat rode Lüchten an,
väl lütte Lusbeern dick un drall
anne Twiegen œwerall
warmen Och un ok dat Hart,
wenn dat buten köller ward.
Ok mien Vågels freugen sik,
wat schilpen Meisch un Lünk vör Glück,
daun so ehren Dank bekunnen
för dei Lusbeern, dei's hemm' funnen.


19.6.2022

Aktuelle Inlådung:

Platt inne Kark mit Behrend Böckmann

An'n Sünnabend, denn 9. Juli 2022 is't wedder so wiet:
Nåmeddachs Klock vier stellt Plattschriewer Behrend Böckmann taun 15. un allerletzten Mål plattdüütsche Riemel un Verteller rund üm "Dat Rosinsche Land"
inne Kirch Rosiner Kark vör.

All Frünn' von uns plattdüütsch Mudderspråk sünd hartlich willkåmen.
Un as alle Johr gifft dat as Bilach Wåder un Musik, wenn't heiten deit:

Siet't Middelöller is bekannt,
dat einst in uns Rosiner Land
von wiether sünd por Mönche kåmen,
dei uns hemm' gäben dissen Nåmen.


Kark in Kirch Rosin, Teknen von W. Fritsche ut Bölkow, 1994



na baven