Noch en Eddelfalter, un noch en Ogenfalter! Dat Wooldbrettspeel faszineert avers besünners dör sien wunnnerlichen Naam. Sitt dor een deep in'n Woold, 'neem dat düüster un schattig is, un speelt en Brettspeel, bit "Gnomen un Elfen erwacht"? Wat speelt he — Dame? Schach? En unbekannt Speel?

Düsse lütte Falter deit dat apensichtlich. He is vullkamen anpasst an dat Leven in'n Woold — de Bavensiet vun sien Flünken is bruun mit de schöne Flecken- un Ogenteknen; de Ünnersiet is gröön marmoreert. So kann he sik in jede Ümgeven unsichtbor maken, wenn he will — is de Ümgeven gröön, sleit he de Flüchten tosamen, is se bruun, sleit he ehr op. Liekso kann he sik annersrüm ok sichtbor maken.

In dat Bild baven sühst de gröönliche Ünnersiet un vun den halv utbreedten Flünken en gefählich utsehn "Oog" to'n Afschrecken vun Fienden opblixen. — De Ruup vun't Wooldbrettspeel is ganz un gor gröön un unschienbor.

In dat Bild baven warmt sik dat Wooldbrettspeel op en olen Holtplacken, de dröög un vun de Sünn mit Warms optankt is. Düssen Falter finnst nich faken an Blomen, sünnern veel an Frücht un Bööm, dor suugt he söten Saft rut. So kann dat Wooldbrettspeel sien Leven ok deep in'n schattigen Woold föhren, mang Elfen, Gnomen un Kobolde. Dor is dat tohuus.

 

wunnerlich falter
welk speel speelt wi
hier deep in'n schadden vun de bööm?

dat is dien speelfeld
du büst dat speelfeld
brettspeel
hier in'n woold

ik maak mien töög
mit tögern
röögst du de flünken
wesselt de speelsteen ehr plätz

dat geiht üm allens
för di un mi
un ik föhl, ok wenn ik verleer
winnt wi beid.