Bottervageljohr 2018

In de verleden Johrn sünd uns flegen Insekten gewaltig trüchgahn. Dorüm hebbt wi düt Johr en Kalenner uns Bottervagels toegnet. Thomas Seemann hett för en Fotokalenner (rutbröcht vun sien Team "Tandem"/OBW) de schöönsten Bottervagelfotos tohoopstellt. Wi bringt de Fotos hier, stellt de Bottervagels vör un ehrt ehr mit en Vers.

Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.


Bottervagel vun'n Januar:
Dat Landkärtchen

vun Thomas Seemann un Marlou Lessing


Dat Landkärtchen is eerst siet ca. 100 Johr in Noorddüütschland heimisch. Dat dat na Holsteen inwannern wull, liggt op de Hand, denn sien wichtigste Plant is uns Nationaalplant, de Brennettel.

Op düt Foto sühst good, wo dat Landkärtchen sienen Naam her hett: Nich de Bavensiet vun sien Flögels, sünnern de Ünnersiet wiest en Teknen, de as en ole Landkoort utsüht. De schöne helle Strich wist, dat dat en Sommer-Landkärtchen is. De Flögels vun düssen Falter köönt nämlich heel ünnerscheedlich utsehn, je nadem, wat dat Deert in'n Lent orr in'n Sommer sluppt is. De Sommer-Landkärtchen sünd baven heel dunkel, avers mit den schönen hellen Striepen, de ok an de Ünnersiet to sehn is. De Lent-Landkärtchen sünd heller, baven mehr geelbruun un alltohoop lütter.

Düt Bild wiest de schöne Flögelteknen vun en Sommer-Landkärtchen.

De Sommer-Landkärtchen levt ok bloots een Sommer; se leggt denn de Eier, ut de de Rupen sluppt, de sik denn verpuppt un in'n Lent as Lent-Landkärtchen sluppt. De Lent-Landkärtchen tüügt denn wedder de Sommer-Landkärtchen usw.

De Rupen freet de Brennettel, se freet ganze Büsch meist kahl. De utwussen Falter will blöhen Planten in moorig-fuchtiges Gelänn, Braakland, Knick- orr Wooldränner. Vun de Rupen un de Falters ernährt sik mennig Vagels, Spinnen un anner Deerten.

Lütte Landkoort,
wies uns, woneem du leven kannst,
woneem wi all tohoop
Land findt!
Wies uns dat
mit dien sachten Flögelslag!


1.1.2018


na baven