vun Meike Balzer-Fraun

Radoorloff 2010 in Rinteln an de Werser. Wo sinnig leep dat vun Rinteln na de Porta Westfalica hen, un wat'n Plackeree weer dat trüch — werseropwarts!

Heff eenfach slapp maakt. Mien Mann müss mi un mien Rad de letzten 10 Kilometer mit Auto transporteren. Heff in en Kroog drömelig för mi hen seten un op em töövt.
Wo schöön harrn wi dat denn aver den Avend op de Terrass vun't Hotel mang dicke wittlüchten Hortensien! Annabelle heet de Aart — noch densülvigen Sommer kregen twee vun düsse Planten en Platz in uns Goorn. Sietdem lüchten se jeedeen Sommer jümmers stuur weg bi Sünn un Regen, Wind un Wedder. Un bi Frost un Snee sünd de afblöhten Kluusterblöten echte Kunstwarken.

Radoorloff 2014 in Schmöckwitz bi Berlin. Veel Sandweeg, Sünn un Water — swore Touren — jümmers noch ahn E-Bikes. En lierlütt Hotelstuuv, man en bannig groot Terrass. Wi harrn richtig Smacht, un dat Eten weer richtig lecker. Vör allens de Kantüffeln!

"Wissen Sie, welche Sorte das ist?"
"Muss ich in der Küche fragen."
Denn keem de Kock un wies uns den Kantüffelbüddel: Annabelle. Wi kregen en Naslag.

Dit Johr heff ik de Fröhkantüffel ‚Annabelle' endlich mal sülvst plant. Se hett sik richtig fein maakt!

Nu hefft wi wekenlang Annabelles an de Terrass to'n Bekieken un oppen Töller to'n Geneten. — Oorloffsandenkens vun de besünnere Oort!