Aanten in't Water

vun Klaus Groth

Aanten in't Water,
Wat för'n Gesnater!
Aanten in'n Diek,
Wat för'n Musik!

De Waart is wat heesch: Wat wat wat schüllt wi eten?
Murt, in'e Murt, in'e Grund is dat fett!
Höja! de graue fangt lud an to reden:
Quark un warm Water! Un alle roopt mit.

Aanten in't Water,
Wat för'n Gesnater!
Aanten in'n Diek,
Wat för'n Musik!

De Rünnsteen hentlank all in't Trünneln un Snappeln!
Barbeent un plattfööt, un jümmer vergnöögt!
Hier is de Kökenguss! Beersupp mit Appeln!
Wackeli, gackeli — süh, wa se sökt!

Aanten in't Water,
Wat för'n Gesnater!
Aanten in'n Diek,
Wat för'n Musik!

Nu op'n Wall! un nu roopt wi de Günner!
Nu kaamt se an, un nu gifft dat en Snack.
Nu fleegt wi dal, un nu dukt wi uns ünner!
All dat warm Water löppt blank vun'e Nack!

Aanten in't Water,
Wat för'n Gesnater!
Aanten in'n Diek,
Wat för'n Musik!

Wat wat wat wüllt wi? Nu wüllt wi na'n Misten.
Höör! se döscht Weten! Wi kruupt dör de Rill!
Kaamt man! man sachden! op Tööntjen! mit Listen!
Nückt mit den Kopp, un eet gau, un swiegt still!

Aanten in't Water,
Wat för'n Gesnater!
Aanten in't Stroh —
Wat för'n Halloh!

Dar kummt de Kööksch! neiht man ut, brukt de Flünken!
Hoch över'n Tuun un koppheister na'n Diek!
Swimm'n as de Poggen un flegen as Lünken,
Klook as en Minsch — un so dick! un so dick!

Aanten in't Water,
Wat för'n Gesnater!
Aanten in'n Diek,
Wat för'n Musik!