vun Berthold Cordes

De 27. Juni

Boren sünd se al vör Weken,
vundaag is jümehr Namensdag.
Daags över doot se sik versteken,
denn rögen doot se sik bi Nacht.

De Söbenslöper is en Deert, dat to de Gnager höört. He lett meist so as'n Katteeker, is aver düütlich lüttjer, hett grote, swatte Ogen un dralle Ohren un sien Steert is minner buschig. He kann goot an Bööm un Wannen hoochkladdern. Sehn doot wi em nich veel, avers he is nich een vun de bedrauhten Aarten; he is man bloots opleevst bi Nacht togangen (dorwegen ok de groten Ogen, as nachtaktive Deerten de faken hebbt). Liekers heff ik den putzigen Buttscher annerletzt bi Dag in mienen Goorn bemött — un knipst.

Wenn de Söbenslöper utwussen is, fritt he op't leefst Hasselnööt, Bookeckern,  Aaft un annere Früchten. In'n Winter höllt he en langen Winterslaap, deep inbuddelt in de Eer, meist vun Oktober bit Mai — also över söben Maanden. De Slaap  kann aver uk länger duern, wenn he dat Geföhl hett, dat ward en slechtet Foderjahr. Aver woher weet de Söbenslöper dat? – Nu, dorför hett he in sik binnen en Klock, op de he sik verlaten kann.

So slöppt he ok mal — nich ünner de Eer

En ole Buernregel seggt: „Söbenslöper Regen – söben Weken Regen“ or „Is de Söbenslöper natt, regent dat ahn Ünnerlaat“.

Seker is aver ok: Wenn dat af den 27. Juni söben Weken Regen gifft, kann de Söbenslöper nix dorför. Un jedeen recht doon kann woll kener. De een will so veel Sünn, wiel dat he Urlaub maken will, de annere will Regen hebben, wiel sünst ut sien Oornt nix ward. Un de Söbenslöper will eenfach bloots en godes Foderjohr mit vele Hasselnööt!

Un he kann uns ok wiesen, wat en Hark is!