Striet üm't schönste Gäl

vun Behrend Böckmann


Jedet Johr tau Lenzentiet
Gifft dat wedder groten Striet,
As ümmer üm denn glieken Kråm
Denkt sik dei olle Håsenbråm.
Dei Rapp höllt sik för œwerklauk,
Låwt ümmerfurt sien gälet Dauk;
Dei Bodderblaum gifft dormit an,
Dat man ehr Bläder äten kann
Un so strieden's bannig väl
Wecker wull dat grellste Gäl.

Wi Bodderblaumen hemm' ierst Rauh,
Wenn uns Bläudenkörff sünd tau,
Un wenn uns Sünnenstråhlen dråpen,
Måken wi sei wedder åpen.
Ut Bläudenköpp so boddergäl
Up einen langen gräunen Stäl
Binnen Mäten sik 'nen Kranz
Un gåhn dormit taun Kinnerdanz.
Schon dei lütten Kinnings weiten,
Dat wi Bodderblaumen heiten;
Sünd wi olt un Wind deit weihn,
Kann man uns Såmen fleigen seihn,
Dorüm sünd wi in unser Land
Ok as Pusteblaum bekannt.

Uns Bläuden kennen keine Rauh,
Sünd sei up, gåhn's nich mihr tau,
Unse Lippen blieben åpen,
Wenn dei Bodderblaumen schlåpen,
Sei lüchten wiethen inne Nacht,
Sülfst wenn kein Månd an'n Häben lacht;
Bi Sünnschien sünd's ganz wiet up
Un dei Hummeln fleigen rup,
Dornå wasst för't niege Läben
Såmen von ein Schluf ümgäben,
Un disse Küürn sünd wunnerbor,
Sei kiemen noch nå hunnert Johr.
As Håsenbråm sünd wi in't Land
Ok as Bessenstruk bekannt.

Uns' Gäl, dat lött kein Imm' in Rauh,
Dorüm summen's ümmertau
Up uns Bläuden, wenn's wiet åpen,
Üm ehr Honnigquell tau dråpen,
Un ok dei Minschen sünd entzückt,
Wenn dat bi uns nå Honnig rückt.

Uns Samenküürn sünd schwatt un rund
Un ehr Œl is sihr gesund;
Anners lött sik't ok verwennen,
Deit man dor ut Fusel brennen,
Denn kåmen is dei niege Tiet,
Wo't Auto löppt mit Biosprit
Un männig ein, hei weit dat schon:
Rappstroh ward tau Öko-Strom.

An grote Wüür hemm' sei nich spoort
Un jeder wull up siene Oort
Mit sien Gäl denn bannig pråhlen,
Dormit ok grote Biller målen.
Güllen lüchten Wisch un Feller,
Dei Rämel sonn ganz bäten heller,
Doch as sei sik ehr Wark bekieken,
Bild mit Bild denn so verglieken,
Kümmt sei ganz fix in ehren Sinn,
Dat sonn Striet bringt gor nicks in.


3.4.2022


na baven