Wülf sünd ja na Düütschland trüchkamen, un in Sleswig-Holstein woorn al mennig sehn — aver merrn in de Stadt?! Weer dat nich gefährlich?

As ik annerletzt Swattenbeek besöken dä, sünd mi merrn in de Stadt twee Wülf in de Mööt kamen. Se staht tosamen direkt vör't Raadhuus, blangen en smuck Beet mit Heideplanten. De Wülfin steiht geruhig op dree Poten, treckt de een anmodig an; dat Heken söcht en betern Utkiek, indem dat he de Vörrerpoten op den Rüch vun sien Partnerin sett. So steiht he ok in't Swattenbeker Stadtwappen.

De Bronzewülf vun Swattenbeek. Klick op to'n Vergröttern!

De Bronzewülf vör't Raadhuus. Klick op to'n Vergröttern!

De Statuen schallt nämlich nich de Wülf ehren, de sik wedder bi uns infunnen hebbt, sünnern de uurole Riddersfamilie Wulf, de as Grünners vun Swattenbeek gellen doot. In't Johr 1291 is to'n eersten Mal verbürgt, dat düsse Familie an de "swatte Beke" den Woold dalslaan un en Dorp gründt hebbt — de Anfang vun Swattenbeek. Ridders weern dormalen mehr so Roovridders, avers ut de Sicht vun hüüt ok arme Sluckers; se hebbt en lütten Knüll opschüddt un sik en höltern Borg buut, 'neem se ehr lütt Regiment slecht un recht verdeffendeert hebbt. Good 200 Johr hett de Familie hier dat Leit hatt, denn is se verlöscht. Swattenbeek ehrt dat Riddergeslecht nich bloots mit de Skulptur, sünnern ok mit den Naam vun den Platz vör't Raadhuus.

Klick op to'n Vergröttern!

De Skulptur hett mi bannig intresseert. De Wülf laat so licht un elegant, so lebennig un fründlich, se hebbt en Persöönlichkeit. En Naam vun en Künstler*in stunn dor nich an. Also heff ik nafraagt. Un kiek, de Skulptur is vun Karlheinz Goedtke (1915-1995), den beropen Bildhauer un Bronzegeter, de so vele schöne Kunstwarken in Hamborg un Holsteen laten hett. 1983 woor de Skulptur tosamen mit dat (dormalen niege) Raadhuus un den Platz inwieht. Dat Foto nerrn hebbt mi de netten Lüüd vun't Amt Swattenbeek tostüürt, wi wiest dat hier mit ehrn Verlööv. To sehn is Goedtke hööchstpersöönlich an't Mikrofon, dorblangen de dormalen Ministerpräsident Barschel un en ganzen Koppel Schoolkinners.

De Künstler sülven snackt bi de Inwiehen 1983. Klick op to'n Vergröttern!

Op dat Bild kannst ok sehn, dat dat hüdigendags Heidebeet dormalen as Brunnen anleggt woor. Goedtke schreev sülven dorto: "Da sich im Schwarzenbeker Stadtwappen unter dem aufsteigenden Wolf eine Wellenlinie befindet, habe ich die Wolfsgruppe für einen Brunnen gestaltet." De Wellenlinie symboliseert sachs de lütten Waterlööp üm Swattenbeek, in't Bild de Swattenbeek sülven.

De Swattenbeek. Klick op to'n Vergröttern!

Beten humorig seggt Goedtke wieder:

Dat Dokument heff ik ok via dat Amt Swattenbeek insehn köönt. Villicht seggt Goedtke op dat Foto jüst düsse Wöör. — Blangenbi is de Baas in't Raadhuus opstunns en Daam.

Skizze vun Goedtke to de Wulfsskulptur.
Quell: Stadtarchiv Schwarzenbek, Nr. X 144

Swattenbeek dröff sik ok "Europastadt" nömen, dat hett al 1961 den Europapries kregen — för sien övertügen Instahn för den europääschen Eenheitsgedanken, indem dat se vun 1955 an mit as Eerste na den 2. Weltkrieg Städtepartnerschapen mit anner europääsche Stader söcht hebbt. De Europa-Pries woor 1955 in't Leven ropen, de schöne bronzene Plakette wiest in de eleganten Figuren den Stil vun de Tied, den wi ok bi vele Gestalten vun Goedtke sehn köönt. Goedtkes Wülf harrn den Stier vun Europa ok nienich anknabbert. Düsse Wülf sünd övertüügte Europäers. Un symbolische Deerten verdraagt sik good ünnernanner. —

Hüüt höört Swattenbeek ok to de Gemeenden, de ehrn Oortsnaam ok op Platt op't Schild schrievt. Dat heff ik nich fotografeert, wieldat ik mit de Bahn fohrt bün. Dort steiht dat (noch) bloots op Hoochdüütsch. — Na, Düütsche Bahn AG, woneem blifft de Foortschridd?

An'n Bahnhoff vun Swattenbeek. Klick op to'n Vergröttern!