Kunst an'n Sievekingplatz

Justitia mit Sweert un Waag

In Hamborg gifft dat den Sievekingplatz. In dat Book vun Rita Bake „Ein Gedächtnis der Stadt – Nach Frauen und Männern benannte Straßen, Plätze, Brücken in Hamburg“, Bd. 1, Landeszentrale für politische Bildung, Freie und Hansestadt Hamburg 2015, — in düt Book also steiht, de Platz is 1911 na den Hamborger Juristen, Senator un 1. Präsidenten vun't Hanseatische Oberlandesgericht, Ernst Friedrich Sieveking, nöömt worrn. Sieveking hett vun 1836 – 1909 leevt.

An dree Sieden vun den Platz sünd Justiz-Gebüden. Links in de Mitt is dat Oberlandsgericht, noordlich dat Strafjustiz-Gebüüd un gegenöver dat Ziviljustiz-Gebüüd. In de Gebüüden sünd de wichtigsten Gerichten vun Hamborg ünnerbrocht, as dat Hamborgische Verfassungsgericht, dat Hanseatische Bövelst Landsgericht, dat Landgericht un dat Amtsgericht Hamborg. Se sünd all üm de Johrhunnertwenn vun dat 19. in dat 20. Johrhunnert buut worrn.

Dat gesamte Figuurn-Ensemble mit den Kaiser in de Midd

Links vun dat Zivilgericht, op en gröne Wisch, de an de Straat Holstenwall grenzt, steiht en groote Skulptur vun den eersten düütschen Kaiser in de Niegtied, also Wilhelm I., de op'n Peerd sitt. Verdeelt op de Wisch sünd noch veer Figuren-Gruppen, de en Allegorie sünd för de Rechtsordnung, de Sozialgesettgeven, dat Post- un Fernmeldewesen un dat eenheitliche Maß- un Münzwesen. Dor kannst sehn, welk Themen in de dore Tied de gröttsten weern. In uns Tied wöörn wi villicht den Ümwelt- un Klimaschuul un de Geslechtergerechtigkeit orr ok dat Internet dor afbillen. Elk Tied hett ehr Themen.

In'n Achtergrund, vör Kaiser Willi, dat "Eenheitliche Rieksgesett"

De Grupp „Dat einheitliche Reichsgesetz“ ward dörch en Fru repräsentiert. Se höllt dat Riekszepter in de linke, dat Gesettbook, ut dat en jugendliche Richterin Recht sprickt, in de rechte Hand. De buten Kraft setten Gesettböker vun de enkelten Staaten hett en Jung openanner schicht.

Dat Rieksgesett un de junge Richtersch. Nich, dat dat dormalen al Fruuns as Richterinnen geven harr! Nee, dat hett noch lang duert. Aver se stött al mal dorop an!

Lütt Jung mit de ungülligen olen Gesettböker

De Skulptur weer toeerst 1903 op den Platz vör dat Hamborger Rathuus opstellt, is aver 1930 an'n Sievekingplatz brocht warrn.

As ik de junge Deern fotografeert heff, harr se en Glas in de Hand. Villicht hett se Justitia, de as Skulptur op dat Strafjustiz-Gebüüd an den Platz gegenöver steiht, toproost, denn siet de Tiet hett sik jo en Barg verännert. Hüüttodaags hebbt wi in Düütschland 'n Invaliditätsversekern un Versorgung för dat Öller, bi dat Post- un Fernmeldewesen hett sik ok allerhand verännert. Dor mutt nich de Götterbote Hermes ünnerwegens ween, un de junge Fru bruukt uk keen Breef aftoschicken – kann se allens mit Internet maken.

Prost! Op de Tokumst!

Starke Optridd: De Richtersch in Sandalen

Dat eenheitliche Post- un Fernmeldewesen orientiert sik global

Dat eenheitliche Münzwesen: Ja so höört sik dat för en Fru, toföten vun en Mann! Un beid hebbt Geld in'e Hannen

De globale Kommunikaschoon un achtern Kaiser Willi

De Jung links blangen dat Münz- un Messwesen vereenheitlicht al mal de Schohgrötten

Dat Geld blifft in de Familie

De Soschaalgesettgeven weer dormalen teemlich minn —
vergleken mit hüüt — un liekers en grote Foortschritt

Soschaalgesettgeven: Opa hett dank en lütte Rente
to eten — nämlich Supp, denn för'n Gebiss langt
dat nich. Ok de Schal stammt vun hüüt.

Ok dat Museum för Hamburgische Geschicht is nich wied!

De Künstler vun de Skulpturen is de düütsche Bildhauer Johannes Schilling. He is 1828 in Mittweida (Sachsen) op de Welt kamen und 1910 in Klotzscha, dat is hüüt en Stadtdeel vun Dresden, storven.

Schilling mutt en bannig begaavte junge Minsch west hebben. Al mit 14 Johren is he an de Kunstakademie in Dresden kamen, vun 1868 bit to sien Doot 1910 weer he Professor an de Kunstakademie, hett in sien Leven 'n Barg Utteken för sien Arbeit kregen un weer Ehren-Börger in verscheden Städer. Hamborg hett em aver keen Ehrenbörgerwöörd geven — ofschoonst he so vele prächtige Figuurn för Hamborg maakt hett.

Dat Gesett un sien Richtersch seggt adjüs