Rosen

vun Katja H. Renfert


In Petermanns „Almanach för den Biogoorden“ (Verlag Ludwig, München 2009) steiht, dat de Braakmaand de Tiet vun'e Rosen is.

De Bloom, de mennigeen uk "Königin vun'e Blööm" nömt, is en stickelige Schöönheit. Se hett aver keene Döörn, as veele Lüüd oftins seggt, sünnern Stickels. Stickels sünd man blots ut de baveren Zellschichten rutwussen, sünd quasi de Huut.

De düütsche Schriever Friedrich vun Bodenstedt (1819 – 1892) wußt villicht nich den Ünnerscheed twischen Döörn un Stickels. In en Gedicht seggt he:

De sööte Ruuch vun de Roos genögt,
man bruukt se nich to breken —
un welkeen sik mit den Ruuch begnögt,
den ward de Doorn nich steken!

 

In den Hamborger Park „Planten un Blomen“, in de Neeg bi'n Ingang „Fernseh-Turm“, steiht vun de Künstlerin Barbara Haeger (1919 – 2004) en Fruuns-Skulptur. De hett dree Rosen in'ne Hand.

Düsse Figur is 1953, mit twee annere Fruuns-Skulpturen, vör de „Rosenhöfen“ opstellt wurrn för de „Internationale Gartenbau-Ausstellung“, wo ünnerscheedlich KünstlerInnen mit Kunstwarken bidragen hebbt.


Haeger-Skulptur


Haeger-Skulptur


Detail Haeger-Skulptur

In'n Park gifft dat uk dat „Restaurant/Café Rosenhof“. Dat is gegenöver vun'ne
Musikpavillon un vun Mai bit Ende September open vun Klock teihn in'e Fröh bit Klock teihn avends. Un noch'n Stück wieder is de hüütige Rosengoorden, mit'n lüttjen Info-Pavillon. Dor sünd Bänk to'n utrohn, un namiddags speelt se klassische Musik ut Luutsprekers.

Rosen sünd aver nich blots schöön antosehn un rüken angenehm, nee, de Rosenblöder kann man uk eten! Dat gifft 'n Barg Rezepten, un letzt heff ik graad vun en „Patissière“ op'n Kunstmarkt en Tafel Schokolaad, mit Rosenblööd op, köfft. Hhmmm, lecker!! De weer twoors beten dürer as vun'n Supermarkt, aver af un an mutt sowat ween! Ach, un nich to vergeten uk Rosenwater un Öl för schööne Huut.

Geneten wi de Rosen mit all unsen Sinnen!


Gedicht ut: 'Die schönsten deutschen Gedichte', hg. von Andreas Simon, Verlag Die Bibliothek, München o.Jg.; Platt vun Katja Renfert


29.5.2011

trüch


na baven


na't Flack

na de Startsiet