Ick drööm van Nowogrodek
Van Wulken sünner Lücht
De Stadt is oolt un hett veel Dode sehn
Litauer Polen Russen Düütsche ok
Se wiest di Gräver Kuhlen mit un sünner Steen
Ik kiek nu sößtig Johr' in't Duuster un in'n Daak
Un drööm un fraag un söök man nix blifft stahn
Dat is to laat dat is vörbi dat weer doch Nacht
De Tiet de Johren un de Wind sünd dröver gahn
Vadder weer fiefundartig ik weer söß.
***
He leeg nu daar an'n Sloot
De broken Been as Füür
Dat Düüster wiet un siet
De Barken un de Heven witt un swatt
De Larm de weer vörbi
He seeg nix mehr un kunn ok nich mehr schreen.
Un as de Heven up em rünnerkeem
Weer daar de grote Stern un denn de lütt
De as sin Söhn up sine Schuller seet
Up sine Schuller ritt meist as sin Söhn
Regen
Harr dat denn regent de Nacht
***
Ick drööm van Nowogrodek
Van swatt un witte Steen
In Johren stampt to Mulm un Schiet un Stoff
Henweiht de Noom de Daag in Biesternis de Steern
Keen de di antert levig edder doot
De swatten Büsch an'n Sloot harr ik de güstern sehn
De Schören in'n Asphalt sünd de all gröter worrn
Rögt sik de Doden all
***
Ik drööm van Nowogrodek
Van Kohle un van Nacht
De Johr geiht hen as tiedig fallen Snee
Wittrußland is nich witt
Dat is as Isen swatt
Un hollt de niegen Daag mit isern Klöön.
Vandag warrst du de Bloodspoor nich mehr wies.
Se hefft dat daarmaals Mittelafsnitt nöömt
He weer daar mang in Dod un Blood un Schiet
Dat huul to'n Heven as de Jüngste Dag
Un so veel Leven güng daarbi toschann'
Dat van Teindusend meist nüms wedderkeem.
Litauer Polen Russen Düütsche nich.
***
He harr nix seggt as ik em seeg de Nacht
Miteens daar bün ik upwaakt un he keek mi an
He stunn güntöver an dat Footenn van mien Bett
As Nevel meist as Lücht dör Ruuk un Daak
Een Strämel Lücht keem dör de Kökendöör
Ik heff em sehn as klaar as disse Hand
Sien scheevet Grienen geit mi hüüt noch na
Ik weet nich hett he wunken un denn weer nix mehr.
Un kumm daar all de Johren nich van af.
