Notizen ut'n Nevelmaand

du lütt juwel an'n stratenrand,
midücht, du büst je nich vun hier:
as gast ut en exootisch land
seilst du as fallschirm mang de spier
vun gras. du wusst nich op hier, nee,
du fullst vun baven ut de höh.

du lütt fernööstlich schirm vun ries,
wo is dien sünn, wo dat gesicht,
dat du beschirmst op frömde wies?
du snackst; ik kenn dien tungslag nich.
du lütt japanische pagood,
wees man behöödt in gode hoot!

Jesaja 43, 19:
Kiek doch, ik will en Nieges schaffen; dor wasst dat al op, erkennt ji dat denn nich?

Geswisterbööm, Geswisterbööm,
een reet de beiden uteneen;
de een, de leevt, höllt noch de Hand
vun't annere, gifft em Bestand.
Un ok för den, de ehr versehr,
höpt wi, dat he düss' Wiesheit lehr.

ok wenn ik hier verfänglich grööt,
swöör ik, dat ik nich Hitler heet!
dat ganze is mi dull schaneerlich,
denn ik bün pazifist, ganz ehrlich!
un ok de dösige frisur
heff ik förwiss nich vun natur!

natuur is nämlich en idyll
üm mi. man nüms fraagt, wat ik will!
de kant hier höört to't militär.
ik segg di, dat sünd blindgängär!
ik kann nix doon. dat is nu maal
dat schicksal vun so'n iesenpahl.