Notizen ut'n Maimaand

in ringeln üm den levensboom
vun mai to lüchen mai
windt sik uns johrn —
dor, 'neem de wind
mit bunte bänner speelt,
dor wüllt wi hen...

de levensboom
warrt slank un slanker
vun mai to lüchen mai —
dor, 'neem de wind
mit bunte bänner speelt,
geiht't nich veel wieder...

doch geiht dat wieder!
in den himmel wiest
de spitz, de över bunte bänner
ehr fladdern sik heevt
in den himmel...

dunkler un deper warrt dat blaag
je höger sik uns leven windt
allns laat wi achter uns
seht bloots dat blaag
dat depe blaag

un eis,
an't enn
vun'n levensboom
— orr an sien anfang —
gaht wi in't depe blaag.
dat lücht uns al
vun mai
to lüchen mai.