Notizen ut'n Märzmaand

marilyn

so fröh in't jahr
man de swaan kann nich rut
ut sien fedderhuut
ut sien rull as star
elk momang is poos
publikum elk goos —
kritik orr applaus —
nienich en paus
vun de rull as star
eensam vör de schar
man ut sien sülverhuut
so wunnerbaar
kann he nich rut
nich op de ringste pütt —
en flöök in witt.

tournesol

söchst du de sünn
mit dien gesicht
fallt de schadden
di to fööt
beid, ahn besinnen
verehrt ji de sünn

still swiggt in de merrn
dat water
man bloots jüst to sehn
stillkens glinstern in de sünn
denn dat hett künn
vun ünnergrund

blaag de heven, blass de sünnenschien —
allens noch griesgröön —
man düsse wogen, hest ni sehn?
dach een dor etwa an de ukrain'?