Notizen ut'n Märzmaand 2005. Biller un Texte

Notizen ut'n Märzmaand: Planeet Eer
op de goornkant ut de anner welt fief föötstappen vun buteneerdsche vagels landt un wedder verswunn — "beam me up!" — en höpen blifft, dat mehr fööt den weg wiest dorhen, 'neem de lütte fahn steiht de seggt, 'keen wi nu tohöört. in besitz nahmen sünd wi, annerland, de maan orr en ganz frömde planeet...

		stargate de momang, 'neem du sühst: düt is dat door na de anner welt — de momang is sülven dat door.

woneemhen, winter? nüms kiekt — nu weghuschen in de anner welt, 'neem wi kamen sünd — du as ik. din spoor so fee — tupfen, ornament; en verswinnen as nix, en relikt as en verspreken.

allens hier is verwunschen allens is ganz wat anners, ümtakelt, wokeen wat vörtospeeln? kulisse? aktöörs? an'n weg steiht en japaansche pagode, verkleed as dann — 'keen seggt mi den sprook, de rutföhrt ut düt märkenbook?

de heven un de beek hebbt de steden tuuscht, as en aten, as en nix se wohrt ehr geheemnis man bilöpig: unverwacht verraad sik de heven mit en dalfulln schiev vun kristall as en aten, as nix. orr is't afsicht? ik söök oogen, de mi antern köönt, wat't en teken is, man nix hier hett oogen. bloots ehr aten geiht unsichtboor hen un her.
vun baven staht se un kiekt op mi dal, sünner oogen, man ehrn aten kann ik höörn.

dat krokusvolk is ut de eer krapen un leggt mi en levig leit tofööt — woneemhen geiht't so neeg de eer?

amenn steiht dat door na düsse welt, de allee in't leven —— heff acht! slechte wegstreck — avers villicht kannst flegen?
Fotos un Texte: Marlou Lessing mehr dorvun: hier Mit de Anschaffung vun en lütte Digitaalkamera heff ik anfungen, in'n Alldag un bi't Rümströmern in min holsteensche Heimaat eenfache Biller to knipsen vun Ansichten, de mi opfullen, un mit lütte Versen dorbi to seggen, wat mi anspreken dä. In elk Maand kemen poor tosamen. Op Plattpartu bringt wi ehr mit en halv Johr Tiedünnnerscheed rut. Dat is Afsicht: Wat nu is, hebbt wi vör Oogen; man Biller un Versen schallt erinnern an dat, wat us nu feern is, un an de Annershaftigkeit vun'e Natuur in'n Johrsverloop. Marlou Lessing