Notizen ut'n Sneemaand


 

 

de glanz folgt in min tappen na
as en verspreken geiht:
"alltied schallt di folgen
goods un barmhardigkeit" —
un hier, as ik mi ümwenn:
bün't ik? stah ik daför?
kann ik so good ween? orr is düt
de glanz vun din hus, herr?

 

Gutes und Barmherzigkeit werden mir folgen mein Leben lang, und ich werde bleiben im Hause des Herrn immerdar.
Psalm 23, Vers 6


 

 

 

de dagmaan

un so kiek ik, en lierlütt maan,
dörch hoge stangen welt,
wietaf, verleer mi af un an
ut sicht, in't afsiets stellt...

 

amenn liggt all de drauhen woold
as enkelt stämme, fällt
wied ünner'n heven. da bün ik
un allens dat, wat tellt.


krokusblööt in'n sneemaand

keen notiz vun'n krokus,
keen bild vun em!
nix!
biller bloots vun
den eenzigen sneedag,
unwirklich
un ok
nich wohr.
denn dat schöönst, wat de morrn vun't johr geven kann,
is to'n grugel woorn; untiedig, liek as schaamlos
blöht he in'n sneemaand, de krokus.
man nich sin schaam is dat, de fehlt;
en anner schaam hett mankeert — min egen
villicht. dat krokus gegen de regel leevt,
kümmt vun de minschen anstandsvergeternheit. dorüm
is't, dat ik de schöönste bloom
blöhn sehn mutt, min hartensfreud vun eiß
un mi slecht warrt.


Fotos un Texte: Marlou Lessing
mehr dorvun: hier

Mit de Anschaffung vun en lütte Digitaalkamera heff ik anfungen, in'n Alldag un bi't Rümströmern in min holsteensche Heimaat eenfache Biller to knipsen vun Ansichten, de mi opfullen, un mit lütte Versen dorbi to seggen, wat mi anspreken dä. In elk Maand kemen poor tosamen. Op Plattpartu bringt wi ehr mit en halv Johr Tiedünnnerscheed rut. Dat is Afsicht: Wat nu is, hebbt wi vör Oogen; man Biller un Versen schallt erinnern an dat, wat us nu feern is, un an de Annershaftigkeit vun'e Natuur in'n Johrsverloop.
Marlou Lessing


trüch


na baven


na't Flack

na de Startsiet