Biller vun Ludgerd Lüske

De Weeg vun Kunst hebbt keen Ennen. Biller mit'n PC malen

mit kort Inföhren vun Rudi Witzke

Un wenn wi noch wat över de "Form" seggen kunnen, dann harrn wi de ganze Welt to faten: Farven un Formen! Dat sünd Grundbuusteen vun Biller. Dat schall maal so an'n Anfang vun uns Nadenken över Kunst stahn.

Över eene Millioon Angebotte kannst in den PC-Kasten finnen, woans elkeen malen un teken liernen kann. "Elkeen kann malen!" hett de groot Künstler seggt, de in en Stuveneck en Fettklumpen smeert hett. Dat weer grote Kunst. Ik weet nich, wat de Bodder al smolten is.
So veel Utstellen as nu hett dat to keen Tiet geven. Överall wiesen de Künstler ehre Warke, in de Spoorkass, in de Stadtverwaltungshüüs, de Versekerungshüüs.

Dor ward maalt, dat de Appel utsüht as in de Natuur, Farvplacken, de harmoonsch tosamenlüchen orrer nich un ok Appels sien schullt. Denn Placken, Striche, Klekse in alle Farven: Afstraaktes! Kannst en bunt Theater seihn un di veel bi denken orrer nich, nieschirig maakt warden orrer nich, di freugen orrer schüddeln. Un de Künstlers nehmt Acryl-, Öl- un Waderfarven, se nehmt Tooneerd, allens nehmt se, wat en Farvspuur gifft. Se pinselt, kratzt, smeert, sprütt, allens mutt utprobeert warden. Jümmer sünd na de Ogen de Hannen de Hauptsaak. In de Biller flütt dat levig Leven vun de Malerslüüd. Sühst nau hen, kannst ehr Hartpuckern seihn.

Biller jagen uns dörch den Dag: De Bläder bi't Fröhstück, de "Bunten", wenn bi'n Dokter tövst, up de Straat Schiller, woans een gahn un föhren mutt. Un wenn denn an'n PC geihst: Biller — Biller — Biller. Maakst denn gor dat Kiekschapp up, denn is dien Bood vull Biller, de keen Huulbessen un keen "General" wedder rutkriggt.
Dat dat de Bregen so afkann, dat weet wi noch nich, de Ogen köönt dat nich. De brennen di, un wenn een lang vör solk Monitors sitt, kannst nich mehr scharp seihn. Mütten Brillen ran. Brillen för'n Bregen gifft dat noch nich.

Un nu kümmt wat heel Verdeihtes: Biller, de een mit den Compjuter maken kann. Flink noch maal binah 200 Johr trüch: 1827 kreeg de Franzoos Joseph Niépce dat trecht, de eerst Fotografie to maken. 1837 hett Louis Daguerre dat verbedert, woans een Biller mit'n Appraat maken kunn. Nüms hett vun Kunst snackt. Mit de Johren aver is ut de Fotografie sogoor groote Kunst worrn.

Un nu is de Fraag, wat een mit'n Compjuter Kunst maken kann.

Wi Minschen probeeren allens ut, segg ik ja. Un up de Wies hebbt wi dat so wiet bröcht: Autos, Raketen, Revolvers, Mikrowellen könnt wi buuen, nüms kann allens uptellen. Beder is dat, wenn wi vun Kunstoorten snacken, ok wenn se noch so kurioos sünd. Veles nütt den Minschen, wat wi rutfunnen hebbt, to veel is groten Schiet, de Minschen schaden, pieren, ümbringen kann.

In Cloppenburg is nu en Mann dorbi, to versöken, wat een mit den Compjuter malen kann. Un ik glööv, annerwo pusselt ok welk rüm.

Mi wöör dat gor nich wunnern, wenn wi bi den negsten Besöök vun't Modern Museum of Art in Louisiana bi Kopenhagen Compjuter-Biller dor finnen, de utstellt ward. Video-Kunst is al lang in dat Museum to seihn.

Wiß is maal dat Doon vun Bedüden för den "Compjuter-Maler", denn avers ok, wat he trecht kregen hett. Solk Biller kannst di lang ankieken un jümmer wat Nieges finnen, wat, wat di geföllt, wat, dat di in de Ogen bitt. Up alle Fäll müßt de Tiet nehmen, nich lütt beten Tiet, so ornlich lang Tiet. — Wiß is dat beder, mit en Compjuter-Bild so rümtomaken, as in uns upgeregte Welt sik Ogen un Ohren vun Appraten vullknallen to laten. Ik denk, dat is de Sinn vun so en Bild. Un dat is en gode Sinn.

Uns wöör meist dull interesseern, wat uns Besöker mit de Biller anfangen köönt. Wi wiest maal welk un wöörn uns freugen, wenn se ünner de Mailadress witzke@marless.de Ehr Menen schrieven dään. Wi schickt Ehr Anter an den Compjuter-Maler wieder.

De Billermaker ut Cloppenburg heit Ludgerd Lüske. He seggt to sien Biller sülven:

"Dat Billermaoken is ut twei Saoken upkaomen. In den Unnerricht för Biologie un Chemie bruk ik faoken kloar teiktet Wark taun Wiesen för dei Schäulers in dei Projektion of up Arbeitsblöre. Up dei anner Siet hebb ik för use Kunstlüe in'e Schaule woll eis maol utholpen, wenn dei ehr Materiaol besünners afannern wullen.
In Münster fünd ik Alfons Eggert, hei is Buur, dei uk eine besünnere Fotokunst — Subjektive Fotografie — funnen har. — Fotografeiern dau ik uk gern. In dei Schaule hebb ik dat Fotolabor unner mi. — Eggerts Fotografik hebb ik dann versöcht mit dat Tekenprogramm Corel Draw naotaumaoken. Dat geev ähnlicke Biller. Disse Warkereie lööp so sinnig in eine neie eigene Baohn. N' poar van disse Biller, dei ik so siet drei Joahre henkrägen hebb, kennt ji nu uk."

De Biller vun Ludgerd Lüske, de wi hier wiest, köönt Se dör Anklicken vergröttern.

Barg un Baogen

Heaven

De Heven, dick in Folen.
Ji hebbt em sülven leggt.
Wat treckt em glatt,
dörprickt em, dat
us Sünnenlicht verschreckt?

Wietlöftig över't natte Land
sühst Horizonte flegen;
ehrgüstern sünd wi Hand in Hand
loslopen in Richt unbekannt,
sünd barfööt, sünner Reep un Band
op Wulkenbargen stegen.